港隊師兄弟齊踢爭氣波
第73屆港澳埠際賽今午舉行，港隊一眾如陳港斌、劉學銘等U22成員在「大師兄」謝德謙及夏志明帶領下，於深水埗運動場迎戰正在準備應付亞洲盃外圍賽的澳門隊。港隊教練郭嘉諾期望球員打出爭氣波，證明自己的實力夠料做「大港腳」！（Now 633周六下午3時直播）
香港隊今次決選名單中有近半為今夏出戰亞協U23足球錦標賽外圍賽的U22小將，教練郭嘉諾則希望陣中較少代表港隊上陣的球員，藉今仗帶領師弟之餘，亦要證明自己：「佢哋需要用呢場波去證明自己值得獲提升上大港腳。以夏志明為例，我哋一直有留意佢嘅狀態，喺今場波需要好多進攻下，我哋好快就補選咗佢，畀我哋為佢投下信任一票，協助佢返去大港腳。」
埋門質素有改善空間
為備戰今仗，港隊前日跟港超球隊理文友賽，雖然最後以0比2落敗，但郭嘉諾滿意表現：「球隊製造入球機會比對手多，不過臨門一腳可以做得更好，相信今仗有好多埋門機會，希望能夠把握得晒！」對於今夏頻頻與港超球隊友賽的澳門隊，郭嘉諾坦言不敢輕視：「澳門喺亞盃外作客吉爾吉斯都係僅輸1球，防守好好，預計佢哋會加緊防務，再伺機反擊，我哋都做咗針對性部署，不過最緊要係班年輕球員落場放膽進攻！」
澳門隊正為下周二進行的亞盃外主場對印度作準備，主教練陳曉明期望球員重拾狀態：「澳門聯賽正值休季期，加上球員大多有正職，希望球員能重拾比賽感覺。」澳門與香港及印度實力上有差距，這位前天水圍飛馬教練明言會較着重防守。上周澳門受颱風「天鴿」吹襲，原定於8月25日與馬來西亞的友賽取消之餘，場地設施亦受破壞，近6日只能作體能訓練，陳曉明慶幸士氣更勝從前：「風災過後全隊齊心協力希望將事情做好，士氣比之前更強！」