傅家俊132度埋齋全場high爆
全場嗌爆Marco！香港桌球一哥傅家俊（Marco）昨於香港世界桌球大師賽揭幕戰迎戰鶴健士，在一度落後局數1比3的劣勢下連贏4局反勝，打響頭炮強勢殺入準決賽。Marco於最後一局更表演「century」令全場粉絲High爆，賽後他指是要用最佳表現去報答球迷支持！之後傅家俊坦言今日會化身球迷，入場欣賞「經典對戰」的奧蘇里雲與希堅斯，與fans齊齊嗌！
香港世界桌球大師賽昨於灣仔伊利沙伯體育館展開，「Wonder爸」傅家俊打頭陣迎戰「飛鷹」鶴健士。比賽首節Marco顯得略為手緊，一度落後局數1比3。不過，Marco小休之後及時on fire，第6局被鶴健士領先57比0下清枱反勝；第8局更在「超分」穩操勝券後愈打愈有，順勢打出賽事首個「century」的132度，連取4局，總局數反超前贏5比3，率先晉級4強！
現場觀眾心情一直隨Marco的表現高低起伏，即使最後Marco只剩下黑波未打入，球迷仍忍住興奮心情不敢歡呼，以免騷擾他完成清枱。最後Marco成功做出132度埋單，觀眾即時High爆，全場站立鼓掌兼嗌爆伊館！Marco賽後亦特別感激主場球迷支持：「雖然我唔可以好似奧蘇咁成日打147，但打『century』清枱都可以畀本地觀眾有個位拍手歡呼，好開心做到呢點。」其後Marco亦出席簽名會，約數十名球迷早已排隊等待，Marco對球迷有求必應，與粉絲打成一片。
今日入場睇火箭鬥巫師
周六他在準決賽將面對羅拔臣，他承認此仗難打，但將給自己放鬆一天，入場觀戰享受一下大賽氣氛：「今次的氣氛真係好好，我聽日都試吓坐山頂位，盡情嗌一嗌！奧蘇里雲同希堅斯兩個都係頂級高手，相當吸引。」今日比賽將會續演兩場，下午2時先上演卓林普對梅菲，而晚上7時則演超級戲碼，由「火箭」奧蘇里雲與「巫師」希堅斯爭逐。