水晶宮兩大球星賓迪基同韋費特沙夏，嚟到香港後立即接受球會電視台邀請，進行一場另類「香港通識搶答大賽」。兩位前鋒入波就叻，但面對7條有關英超亞洲盃同香港嘅問題，顯然無從招架，雖然兩人答案「離晒大譜」，但娛樂性就攞滿分！
喺7條問題入面，除咗有關於英超亞洲盃的歷史，包括「邊隊波贏多過1次英超亞洲盃（答案：車路士）」「05年英超亞洲盃由邊位前水晶宮領隊奪得？（答案：艾拿戴斯）」之外，亦有不少關於香港嘅問題，例如「香港邊一年回歸中國」及「香港人口幾多」等等。
一如所料，賓迪基同韋費特沙夏嘅答案全部都係「亂撞」，其中一題問「香港大球場可以坐幾多人」，雖然以兩位球星周遊列國嘅豐富比賽經驗，憑肉眼應該可以估得比較貼近，點知賓迪基最後竟然答話可以容納8萬人，認真吹脹！