黃雨無阻！紅軍練波勁落力
利物浦尋日冒住黃雨警告閉門操練，一班球星雖然變晒落湯雞，但依然勁專業落力操練。新兵穆罕默德沙拿練習賽中跑得好搏命，攔截逼搶做到足，為盡早融入球隊作好準備。
因天氣惡劣，紅軍昨早宣布取消下午於旺角場進行嘅公開操練，結果利迷要轉移陣地到紅軍下榻酒店捕獲「偶像」。利物浦下午先於酒店內進行非公開簽名會，到3時半左右全軍登上專屬隊巴前赴閉門操練，出發前Fans一擁而上更差點推倒鐵馬，紅軍隊長佐敦軒達臣同拉爾拉拿就簽到冇停手，場面混亂。
新兵沙拿勁投入
昨日暴雨連場，天文台發出黃雨警告，一度有傳球隊係去麥花臣場館操練，但原來又走返去旺角大球場。紅軍到場後，先由領隊高普訓話，並令球員跑圈，之後經過簡單熱身拉筋後，一眾球星進行小組練習賽，老友鬼鬼嘅佐敦軒達臣和拉爾拉拿踢練習賽都要做隊友，認真癡纏。其他主力包括羅拔圖法明奴、菲臘比古天奴、韋拿杜姆、米洛列特同靚仔門將卡利奥斯都瞓身狂操，紅軍昨晚亦兵分兩路到將軍澳運動場及旺角大球場操練，夠晒認真。