開波喇！有飛未？今日是英超亞洲盃首日賽事，網上門票交易平台「Stubhub」昨日交投活躍，整日見到不停有門票成交，由中午只有40多張門票，至下午3時多下降至得番30張，但去到晚上6時，可能有人見需求增加，又有大量門票流出，但平價波飛炒價由600元起，變至最平也要800蚊，黃牛黨劏客認真有策略。
至於昨日出現最貴門票，是第106段的第1行2張波飛，這位置屬於A Reserve貴價飛，原價600元，有人標價每張4,973元，炒貴8倍，是暫時最高黃牛價，但由於位置優越，只放出不足1個小時已被搶走，兩張波飛連同手續費合共超過1萬元。
至於決賽日波飛則大量流出，早兩日只有幾十張，現時有近200張在「Stubhub」可供選擇，另有交易平台「viagogo」同樣有大量決賽日波飛，唔知最終會唔會炒燶飛呢？