贏「騙子」寶娃攞晒彩寶釵：好多球員撐我！
馬德里網球公開賽上演矚目的「美女大戰」，世界排名60的加拿大球手寶釵苦戰3盤後，以7比5、2比6及6比4擊敗舒拉寶娃，成功打入16強，將會大戰德國姬芭。今場是寶釵職業生涯首次擊敗舒拉寶娃，難怪完場表現興奮，賽後更於Instagram上載「開心到彈起」的照片。
碧基入場畀觀眾寸
事實上，今場「火藥味」濃，寶釵於賽後記者會上坦言，賽前獲得好多人力撐，要打敗寶娃：「我都覺得佢今次所謂『復出』打得好好呀。今場我的確係更有動力去打，賽前其實有好多球員私下叫我『加油』，有啲根本平時唔會同佢講嘢嘅都有，收到好多來自網壇嘅短訊都係撐我嘅，所以今場唔單止為自己而戰，仲係為佢哋，大家都好支持我。似乎大家都同我有相同嘅看法，只係可能佢哋唔敢講啦。」俄羅斯天后舒拉寶娃因為服禁藥被罰停賽15個月，復出後寶釵曾公開指責她為「騙子」，更認為舒拉寶娃應該終身停賽，兩人對碰先會咁多嘢睇。
此外，巴塞隆拿中堅碧基日前忙裏偷閒睇馬德里網賽，點知就畀人寸，勁冇癮。他入場睇自己友、西班牙球手費利亞對古古舒堅比賽，球迷卻不停大叫「Hala Madrid（支持皇馬）」，令碧基頂唔順企咗起身，裁判更要暫定比賽了解事件。這位西班牙國腳坐低後扮聽不到球迷叫罵，繼續睇波，費利亞最後以盤數2比1反勝哈薩克對手。