本年度「香港足球明星選舉」現已接受投票，力爭蟬聯「香港足球先生」的東方龍獅門神葉鴻輝已連續7年入選最佳11人陣容，不過今年卻要面對各路門神夾擊，人氣極旺的冠忠南區門將謝德謙更一度在網上投票領先，今仗正面交鋒，自然要落力飛撲搶分。
表現穩健的葉鴻輝一向是最佳11人陣容穩膽，不過東方龍獅近期防線頻頻失守，勇於承擔的「英雄輝」也直言要負上責任。在首日網上投票，曾於聯賽保持884分鐘不失球的謝德謙一度領先，直至昨晚被「阿輝」稍微超前。今季兼顧講波及主持工作的「阿謙」笑言「多咗粉絲」，但仍會以平常心爭獎：「能夠長時間不失球，後防隊友功勞好大，而且計埋港隊同亞冠盃等表現，阿輝依然好出色，不過見到有Fans支持，都係開心事。」
相比起個人榮譽，「阿輝」期望及時重拾佳態：「近期狀態的確係跌咗少少，守門員較着重臨場感覺，唔似場區球員可憑訓練調整狀態，自己都好努力搵緊方法克服。其實今季好多門將表現都好好，除咗阿謙，阿鵬（王振鵬）亦好穩健，其他位置亦都好平均，暫時都諗唔到香港足球先生有乜心水，相信最後好大機會取決於邊隊贏聯賽冠軍。」