林樂勤虛心重新出發

貝利學徒齋操冇得踢

香港球壇近年不乏新星湧現，但在首場職業賽面對「一哥」東方龍獅也毫不怯場，交出兩個致命助攻，難怪林樂勤會成為今期港超最Hot名字。

「Jordan仔」笑言也有翻看《東網》直播重溫，卻非為回味讚美之聲：「主要係想聽番旁述前輩點評有乜地方可以改善。香港飛馬一班師兄賽後不斷提醒我，年輕球員最忌踢得一、兩場好波就以為自己得咗，練波唔再畀心機就不進則退。我會記住自己仍然係飛馬陣中年紀最小，有冇得出場都要保持虛心。依家先係足球路開始，應該繼續向前望。」

6歲便隨父親好友山度士學踢波，10歲加入車路士足球學校（香港），「Jordan仔」年紀小小已橫掃各項青年與學界賽事的MVP獎項，又曾先後到訪中超球隊與巴西聖保羅青年軍跟操。去年獲英甲球隊貝利簽下學徒合約，外闖夢啟航背後，卻是現實掙扎的開端。由於未能辦理工作證，「Jordan仔」與同行的門將謝家榮，只能「齋操冇得踢」:「英甲一星期有兩場青年聯賽，球隊喺比賽後多做較簡單嘅恢復訓練，好多時仲未夠喉就已練完，惟有同家榮一齊出去球場射波、健身。」

曾經迷惘咪當自己最好波

貝利青年軍每日也有來自五湖四海的球員到來試腳，能留低的卻寥寥可數。「Jordan」與「家榮」是球隊陣中僅有的「外來人」，曾經在香港得天獨厚，人在異鄉卻由零開始。「因為冇得出場，有啲隊友好似睇你唔起。有段時間我都好迷惘，但係唔想父母擔心，每次佢哋問起，我惟有話自己練得幾好。呢一年心態成長係最大得着，每日練波我都會記得喺英國冇波踢嘅日子，機會唔係必然，無論你喺香港幾叻，呢個世界大把人好波過你。」稚氣未脫的笑容，加添了歷練蛻變的謙遜。

回家開啟職業路，雖非當初所願，Jordan無悔決定：「英甲青年軍每年只會拔尖幾個升上一隊，升唔到就只有游走業餘聯賽等機會，唔少隊友已經搵定工。如果同英甲一隊比較，港超技術、節奏唔算差好遠，較大分別可能係身體對抗強度，呢方面亦係自己缺點。青年軍同職業球隊始終係兩回事，點樣同隊友配合、埋門、閱讀球賽能力等等，我仲有好多地方需要學習，希望可以先喺香港有好表現。」「仍需學習」，是Jordan重複得最多的4個字。只有珍惜當下，才可走得更長更遠。

‧林樂勤小檔案‧

出生日期：1999年2月2日(18歲)

效力球會：香港飛馬

位置：翼鋒、中場

身高：1.75米

威水史：全港學界足球精英賽冠軍及MVP、U16足總盃冠軍(南華)、曼聯超級盃香港站MVP