識睇一定睇友人飯聚
自on.cc東網成為港超聯獨家網上轉播媒體以嚟，一直有調配資源去製作節目，今季就推出咗3個節目，包括《Embrace The Moment！我撐港超聯》精華節目、《活在足下》校訪系列，同埋清談節目《友人飯聚》。當中由Yennie身兼策劃及主持嘅《友人飯聚》，今日已經播到第3集，呢集嘅嘉賓就係「豪歌」陳偉豪同埋「文總」文彼得，唔知呢個組合加埋Yennie會產生咩化學作用呢？
陳偉豪扮「賤輝」勁搞笑
Yennie當初構思《友人飯聚》，主要係想跳出傳統嘅框框，為本地波球迷製作一個與眾不同、可以邊睇邊笑嘅清談式節目，等大家可以多角度去了解球圈中人。而第三集嘅《友人飯聚》就分開咗兩日拍攝，首先去到「轟炸機」向柏榮師傅，喺灣仔嘅「榮拳館Bomber Gym」，拍攝模仿電影《激戰》嘅《Kick戰》。飾演「賤輝」嘅「豪歌」鏡頭前表現得非常專業，無論導演咩要求佢都無Say no，包括導演即興要求跑街，十分「專業」。
雖然「豪歌」同「Peter仔」文彼得坐埋一齊就雞啄唔斷，但原來佢哋都有認真一面，兩個幫手度對白，做埋編劇嗰份，認真抵得諗。呢兩位82年嘅大細路更主動要求加插「隻揪」環節，曾經喺「榮拳館」上過堂、跟「向師傅」學過吓拳嘅「豪歌」霸氣十足：「其實我唔識得隻揪，只識打人！」
燒住海鮮整蠱球圈人
齋拍動作片又點會滿足到「豪歌」同「Peter仔」兩件「水怪」呀？一定要加番啲對白畀佢哋發揮吓！第二日我哋去到位於灣仔嘅港式串燒酒吧「深燒酒」（下圖），第一個環節就係「電話大整蠱」，兩位各自打電話畀一位球圈人，跟指示做嘢。不過，兩位大哥口才好、人緣佳，呢個環節可以話係毫無難度。之後Yennie就同呢兩位大哥一邊燒海鮮，一邊吹水，聽吓有咩球圈秘聞爆先！想睇「豪歌」同Peter仔主演嘅「Kick戰」？想欣賞「賤輝」淋漓盡致嘅演出？想聽吓佢哋有幾吹得？快啲上on.cc東網或者「我撐本地波」facebook專頁捧場啦！
場地提供：
榮拳館 Bomber Gym
灣仔莊士敦道194號灣仔商業中心2樓全層
深燒酒
灣仔駱克道397號地舖