大帝着火攻入第10,000球
騎士昨晨作客以120比116擊敗太陽，雖然「大帝」勒邦占士唔能夠連續3場得分30+，但佢喺美國「水神」菲比斯帶埋老婆入場打氣下，全場攻入28分，包括最後3分鐘取得8分，而且射入個人職業生涯第10,000球，帶領騎士完成2連勝。
勒邦占士今仗取得28分、8個籃板同4次助攻，兼且成為聯盟史上，第14個攻入至少10,000球嘅球星，加上路夫有25分、10個籃板同1次助攻，艾榮有27分、2個籃板同7次助攻，即使太陽喺比賽尾段狂追，依然收復唔到半場落後16分嘅差距，2連勝走勢結束。
曾經同占士喺熱火合作過嘅灰熊教練費斯戴爾，最近同傳媒話，唔認為占士退役後會做教練，因為佢太完美主義，教波可能會「殺死某部分人」，呢點占士都認同：「我冇咁多耐性，我連自己個仔隊波都唔會教，我冇可能帶領唔了解嘅球員比賽。」
陰功豬夏登「4雙」率火箭贏波
同日，火箭作客以129比122擊敗速龍，完成8連勝，占士夏登取得40分、10個籃板同11次助攻，除咗26投13中，命中率得到提升，仲包括比賽尾段射入關鍵3分，個人今季第10次「3雙」，不過佢今場有10次失誤之多，職業生涯首次出現「4雙」數據。