Marco幫大女開溫馨生日P

香港桌球「Wonder爸」傅家俊勇奪蘇格蘭公開賽冠軍後昨日凱旋回港，Marco離開機場後，與家人出席九龍城廣場東亞桌球中心為他舉辦的祝捷會，更為大女兒Belle「包包」慶祝4歲生日，贏冠軍後的Marco立即變身湊女慈父，一樣咁稱職，場面溫馨感人。

「包包」將「冠軍爸爸」錦旗送畀爹哋。

傅家俊的「英雄式」回港由機場開始，一早已經有大批傳媒守候，太太Shirley帶同兩個愛女Belle和Amelia到現場，大女更畫了一幅畫慶祝爸爸得獎。愛女Belle看到久違一個多月的爸爸，立即上前拖實爸爸隻手，Marco亦抱緊唔放，父愛滿瀉。

老婆Shirley：佢係我驕傲

經過一個多小時車程和10多個小時機程，Marco面上雖然帶有疲態，但仍十分友善。他表示，今次贏波關鍵是自己的發揮：「這次比賽自己打得幾好，很多時候都會打出一Cue過百分，加上今次趁自己狀態好，博得更多，可能博入一個餐士，就可以打出更高分。」與上兩次奪冠回港相比，Marco覺得每次都很開心，但今次離開香港時間比較耐，感受最深，因為真的很想念家人。