東望洋Day1有驚無險

奧地利車手撞到入院

連串意外由升格為世界盃的F3開始，首次來澳門的19歲奧地利車手哈貝斯保炒得最大鑊，在水塘彎撼欄，大會出動救傷車將車手送院，幸只是腰椎旁肌肉扭傷，經檢查後已經出院，而路車參賽車手澳門的黃家康亦在起步點前的彎角撞欄，車頭起火冒煙。

香港車手都牽涉賽事意外當中，因為打機打得叻而進軍澳門東望洋大賽2.0T的本港新進車手劉錫輝（Edgar），首天練習賽跑完第2圈即告炒車收場，幸人車無恙，Edgar表示：「終於體會到澳門大賽車的刺激感，亦可能因為心情太興奮，戰車仍未熱身便去得太盡，在落山一段撞欄，幸好賽車很快修理好，之後練習和排位賽我會跟足車隊指示，希望造到好成績。」

歐陽若曦豪言正賽「企櫈仔」

GT盃亦有炒車事件，駕駛Bently的香港方駿宇不幸於松山落山時在警察局彎炒車撞向護欄，座駕更冒煙要從跑道中吊走，幸身體無大礙，由於未炒車之前成績不錯，仍然排第10。Adderly事後表示，由於油門塞了，鎖死了戰車而撞欄，但車身損毁輕微，今日可以繼續落場，練習賽他造出的時間暫時排第10。至於「波子王」歐陽若曦則以第7衝過終點，他表示事實證明保時捷很適合東望洋跑道，尤其過髮夾彎時夠快，但相對地直路就稍欠速度，所以他會與工程人員商量，調校戰車，希望可以直路及轉彎做到平衡，發揮「Race To Win」精神，好有信心可以「企櫈仔」。

另一香港車手李英健則以第14完成賽事，他指出，今日並冇刻意造出一個快圈速：「我只是在不同路段去測驗戰車性能，現時只落後頭車2秒，喺東望洋揸車真係好有Feel，之後我發揮一定會更好。」GT盃練習賽最好成績是駛保時捷的班博，同屬Audi車隊的「澳門先生」莫他拿及比利時車手雲科爾分獲第2及第3。

黃兆崑 周兆年澳門直擊