成日聽到人講「有多借畀人」或者「無用先借畀人」，但借得出去嘅，係唔係一定多餘或者無用呢？梗係唔係啦！事關今季開鑼以嚟，最多球迷談論嘅，除咗高效射手洛迪古斯同高美斯、來自德甲嘅林志堅之外，好多表現出色、甚至係賽事亮點嘅球員都係借將，今日《花生擂台》就同大家一齊睇睇幾位奇兵，憑咩成為「新主」主將，甚至福將啦！
港超聯踢到第5周，積分榜上傑志同東方龍獅排頭兩位，一啲都唔出奇，但排第5位錄得2勝1和1負嘅九巴元朗，入球竟然冠絕港超，唔多唔少令人感到意外。雖然九巴元朗12個入球中，有6球係第1周賽事作客港會身上取得，但上場可以作客小西灣反勝R&F富力，就證明呢隊波進攻方面係有計。其實九巴元朗後上勁，第3周作客和香港飛馬2比2場波已經見到，呢場波佢哋喺落後2球劣勢下追平，幫九巴元朗追番1比2，激勵球隊後上士氣嘅顏樂楓，正正就係傑志借將，當日佢嗰吓妙射仲贏得唔少球迷掌聲。
顏樂楓咁講：「今次已經係我第3次外借，但同之前2次一樣，我着得起件波衫就會全力以赴，唔會諗自己係咩身份。外借對我嚟講係好事，於元朗我4次正選1次後備，畀到我發揮機會，好多人都講冇得踢『幾好波』都冇用，我要嘅係出場表現自己嘅機會。」
講到借，又點可以唔數「愈借愈強」嘅理文流浪？上周理文流浪作客斧山道運動場，落後2球同尾段踢少1個超劣勢下，就係憑傑志借將佐迪梅開二度，攞番寶貴1分。今季「大變身」嘅理文流浪，組軍上得到「三巨頭」支持，先後借到佐迪、列斯奧、基頓、謝朗軒、黃梓浩、黎耀昌同張健峰，唔止一條「脊骨」係靠「借」，就連兩邊側擊4個位，都係由借將擔任正選。
「一隊波咁多借將雖然唔常見，但佢哋個個都好專業，好搏命。佐迪同列斯奧唔止做足本分，仲成日過料畀年輕隊友。嚟自東方嘅基頓踢法硬朗，後防一夫當關，又可以客串中鋒，大大加強我哋調動。『兩兄弟』謝朗軒同黃梓浩一左一右，年輕有活力，唔止幫到球隊手，將來仲會係港隊接班人。較遲加入嘅張健峰同黎耀昌，兩個人在陣，球隊攻力大大提高，『張峰』個人技術同傳中球質素都高，職業態度一流，又肯提點後輩，『阿昌』就係近年難得一見具突破能力嘅翼鋒。啲人話好少球隊會有咁多借將，我反而覺得好少球隊可以一次過借到咁多好球員！」理文流浪主教練馮凱文笑晒口咁講。
其他隊都有借將，38歲嘅安基斯既高速又有好技術，得到香港飛馬主帥加倫重用，車潤秋由南華借去和富大埔，隨住球隊兩個中堅輪流受傷，上陣機會愈嚟愈多。由東方外借去冠忠南區嘅年輕門將李溢晉，雖然聯賽未有上陣機會，但聽講話嚟緊菁英盃開打，就好大機會正選上陣，等球隊可以用盡外援額。