可愛Songoku我的生命

除咗女友，就到狗狗，記得志堅初來香港時，筆者同佢一齊去睇宿舍，傑志原本喺鄰近訓練中心嘅馬鞍山，搵咗間酒店式Apartment畀佢，仲可以望到海景，志堅一睇見就極鍾意。不過當Apartment經理話佢聽唔可以養狗時，佢反應超激動：「No! Songoku is my life!」仲話如果唔可以同Songoku一齊住，就寧願返德國踢波。不過呢一點當然難唔倒傑志，球會已經喺烏溪沙搵到一個可以養狗嘅Apartment畀佢，喺泰國踢完熱身賽返嚟，佢就可以同女友、狗狗一齊生活。

志堅同Songoku感情深厚程度，令筆者好意外，志堅話媽媽自佢小時已經收養咗兩頭金毛尋回犬，陪伴佢長大，令佢習慣咗同狗狗生活，兩頭狗狗近年先後離世，令志堅好難過。今年四月，佢喺德國一個最喜歡收養狗狗嘅好心婦人手中，領養咗嘅Songoku，係雪橇與松鼠犬混血，當時只有兩個月大，亦係志堅人生第一頭自己嘅狗狗，自然格外好感情，Songoku既擁有雪橇嘅俊俏外貌，又有松鼠犬嘅嬌小，可愛到不得了。依家Songoku都未滿8個月，但見到久別嘅志堅，表現出嚟嘅興奮，絕對唔比主人輕囉！