林志堅唔做宅男生猛晒
踏入10月，傑志中場林志堅忙個不休，但同時又開心到暈，皆因佢形容為「兩個家人」嘅女友Josefine同狗狗Songoku（悟空）一齊來港相伴。志堅話雖然父母姊姊都喺德國，但依家香港終於有番自己嘅Family，唔使隻影形單。加上香港開始入秋，適應天氣問題亦逐步解決，當堂成個人精神晒，有信心好快可以向香港球迷，展現自己嘅真正實力。
未來外父Christian、外母Corinna同女友Josefine，上周帶同完成檢疫嘅志堅愛犬Songoku來港。Christian喺德國專職教軍人駕駛，工作尚算輕鬆，經常可以抽空到處遊歷，第一次嚟香港，佢非常雀躍，已經兩度入場睇波為志堅打氣，佢話嚟香港前，喺德國都可以上網睇到志堅在港比賽消息。Christian同Corinna逗留咗一星期就回家，留低Josefine同Songoku陪伴志堅。志堅好興奮咁話：「之前我好深閨，除咗訓練同比賽，多數都留喺屋企打機（最愛FIFA 17），依家會抽更多時間陪Josefine到不同地方觀光，等佢可以更快融入香港。」不過喺Christian同Corinna離港前，叔叔Peter車佢哋一家遊馬騮山，志堅就選擇留喺屋企，同Songoku單獨相處，「傾訴」離情。
天氣回涼有信心現真身
來港已經3個月，志堅承認自己狀態進展較預期慢，濕熱天氣一直係最大敵人：「基於上季缺少正式比賽，來港時香港天氣又熱到難以接受，令我訓練倍感吃力，不過我肯定入秋後會有明顯好轉，只要天氣回涼，就可以進一步自我加操，回復喺德國時期嘅訓練量。」經過季初幾場比賽，志堅話自己表現的確未夠好，而且內心掙扎過：「球迷對我期望好高，我曾經考慮過是否應該改變踢法，更獨食去取悅球迷？但最終決定做番自己，自小喺漢堡學踢波時，教練都要求球員有無私精神，傑志亦係一支注重組織嘅球隊，我會繼續忠於自己，唔會刻意賣弄同個人表演，一切以球隊利益為重。」
傑志技術不遜格雷特霍夫
最後，筆者要求志堅將傑志同格雷特霍夫嘅實力作出比較，佢好爽快咁話：「論技術，傑志球員同格雷特霍夫處於同一水平，但論體能同速度，格雷特霍夫就明顯優勝。」不過佢相信天氣唔單止影響自己，對傑志球員亦多少有限制，只要天氣回涼，傑志全隊嘅狀態同表現都有大幅進步空間，希望球迷能夠畀多些少耐心，佢哋一定會付出百分百努力作出回報。
圖/文：張恩爗