張健峰堅毅‧自信

香港隊去年在世界盃外圍賽表現出色，充滿激情，其中兩度賽和中國隊更加大快人心，港腳們優異的演出，吸引到中超及中甲球會的注意。不僅歸化兵有「市場」，就連「本土派」亦不愁寂寞，包括在香港主場賽和中國隊一役，把「中國沙治奧拉莫斯」張琳芃，看管得貼貼服服的張健峰，一時間獲三、四間內地球會的「經紀」及球會代表開出豐厚聘約。

冇得早知 無怨無恨

「嗰陣的確好開心、好興奮，因為自我16歲踢職業波開始，就一直希望可以外闖。不過，『張生』（即南華足主張廣勇）嗰陣話好希望我留隊，仲承諾會加人工畀我，誠意十足。」最終，「張峰」接受會方之條件，打消了北上轉會的念頭。「喺我外借咗之後，聽到好多人同我講『早知』，早知返大陸！早知唔留隊！其實邊有得『早知』，『張生』都唔會早知要借走我啦！何況要踢中超、中甲好講天時地利人和，缺一不可，成唔到事冇得講，更加冇得怨。」

那麼對「呢頭留你，嗰頭借走你」躁嗎？「點解要躁呢？上季中開始我受傷患困擾，狀態保持唔到，會方用我唔到自然要有其他諗法，有佢哋嘅打算。其實今季好早已聽到球隊唔再需要我，依家嘅安排對我、對南華都係最好嘅，起碼我仲有機會去證明自己呀！所以點會躁呢？唔用我又唔借走我，就真係躁喇！」看來，經歷過去一年半載的人和事，令「張峰」成熟了不少。

流浪重遇舊手足好興奮

對於職業生涯第二度被外借，再次為出道初效力長達四年半的母會披甲，綽號「GPS峰」的張健峰坦承充滿憧憬，並希望用表現向曾惡意中傷他的「口痕友」還擊：「好興奮能夠再次為流浪上陣，更興奮可以同佐迪、列斯奧、黎耀昌同陳銘剛幾個舊隊友，再次並肩作戰。理文流浪會方好願意投資，雄心萬丈嘅同時，又對教練、球員萬般信任，管理層各擅其職、各安本分，嚟咗一陣就已經深深感受到，希望喺一班手足嘅努力下，球隊可以達成季前所定下嘅目標。」

「至於我自己一定會珍惜呢次機會，除咗用表現令支持我嘅球迷同朋友唔使再擔心之外，最想係令嗰啲曾經加鹽加醋，惡意中傷我嘅人收聲！」原來自「張峰」在亞協盃分組賽，作客馬爾代夫的馬茲亞「擺烏龍」後，有「口痕友」言之鑿鑿指他「打假波」：「講嘅同信嘅都好有問題囉！你話我渣波冇問題，但假波關乎專業操守，希望大家識得去尊重球員！」收到嗎？「口痕友」！

愛妻手段哥有子萬事足x2

熟悉「張峰」的朋友都會知道，球場上的他是「傳中球之鬼」、「GPS峰」，球場外則是出名錫老婆的「手段哥」，以及絕頂好爸爸。

「手段哥？拍埋『偉豪』（即陳偉豪）同『虎哥』（即李志豪）嗰度，我嗰啲唔入流啦！不過老婆平日要打理家頭細務，又要湊仔，久唔久氹吓佢，畀啲情趣都好應該啫，係唔係？」「張峰」與嬌妻Pecky乃球圈中模範夫妻，偶然在facebook上載恩愛相傳情，Sweet到不得了。

今年5月1日，Pecky為「張峰」誕下兩人第二個愛情結晶品「張幢」，之前常說有子萬事足的「張峰」，如今「有子萬事足x2」，操練過後或不用比賽的日子，唯一嗜好就是在家弄兒為樂：「兩個仔帶畀我雙倍嘅快樂，同樣亦係雙倍嘅責任。我係唔係一個好爸爸？唔知喎，但我肯定係一個好快樂嘅爸爸。」

張健峰

綽號：GPS峰

出生日期：1984年1月1日

司職：左閘、左翼

效力球會：理文流浪

球衣號碼：23

曾效力球會：流浪、傑志、

天水圍飛馬、晨曦、南華

文：戴陶蔚　

攝：司徒子文