東方南華天王搶做MVP
叫全港球迷熱血沸騰的本地甲一男籃聯賽殺入最後衝標階段，兩大超級勁旅東方及南華將於周五假灣仔伊利沙伯體育館進行冠軍系列賽Game 1，爭逐至高無上的總冠軍榮譽之餘，同時香港籃球總會昨日亦正式展示冠軍指環，及鑲有藍寶石的MVP指環，究竟東方抑或南華可以將這枚設計獨特的指環「私有化」？球迷就要記得準時於明早10時投入撲飛熱潮，見證王者誕生！
總冠軍誰屬肯定要打過先知，但講到個人榮譽ＭＶＰ，東方同南華眾將發揮超出色，要揀真係頭都大埋，on.cc《東網》5大球評家蔡芳裕、吳柱業、梁國成、刑安邦及郭子龍為大家嚴選心水球星ＭＶＰ，當中以兩軍大前鋒方誠義「阿GA」及惠龍兒（Duncan）暫時的得票率最高。「蔡Sir」指潘志豪在季尾的狀態「番晒嚟」，加上經驗最豐富，如正選上陣實有力領東方衝擊冠軍！冷靜的Duncan技術同心態一流，對住班尼斯亦有優勢。梁國成亦相當同意，認為東方於季後賽能夠直落2場氣走永倫，「阿GA」起了極關鍵作用，同時刑安邦指「阿GA」今季表現「超全能」，但同時亦欣賞陳兆榮夠Cool兼交足貨。
東方支持票以「阿GA」秤先，至於南華方面，支配了內線的「籃下霸王」Duncan亦得5位球評家高度評價，吳柱業直指惠龍兒的牽引力強大，能搶分之餘更可為隊友製造進攻空間：「Ducan於南華陣中非常重要，但其實羅意庭亦表現不俗，若能控制惹火程度，我相信他的表現會更出色。」「黑龍波」郭子龍亦指出羅意庭及Duncan在得分方面都有亮麗數據，都是ＭＶＰ最佳之選，而東方李琪和「阿GA」都是他的ＭＶＰ心水之選。
甲一決賽門票明早10時發售
為鼓勵2支決賽雄師大打好波，籃總昨展示設計獨特的冠軍指環，贊助商Unico主席、兼籃總會長施超鴻表示「當初設立指環作獎勵是參考ＮＢＡ，希望指環能激勵球員爭標」。「10周年版冠軍指環」環中間「灌籃人像」利用3D刻印技術，充滿立體時尚感，至於18K金ＭＶＰ指環中間V字鑲上藍寶石，突顯Valuable意思。
冠軍系列賽Game1周五開打，門票定價80元，另設長者及學生票50元，於周三早上10時開售透過城市電腦售票網公售，加上冠軍戰當日頭場有永倫對福建的季軍戰，如此精彩戲碼，肯定掀起一股撲飛潮！
東網球評家MVP心水
蔡芳裕：潘志豪季尾狀態回勇，有力領東方爭冠！冷靜的Duncan對班尼斯亦有優勢。
吳柱業：「阿GA」同Duncan都係MVP大熱！其中Duncan的牽引力強大，搶分之餘更可為隊友製造機會。
梁國成：Duncan係南華重心，阿GA穩定性非常高，睇吓邊隊贏決定最終MVP！
刑安邦：除方誠義同惠龍兒外，陳兆榮亦穩定冷靜，梁兆華3、4號位內外兼備都係我至愛！
郭子龍：「阿GA」同李琪、Duncan同阿庭都是能撐起隊波的大將，同樣係我心水之選！
