場數2:1領先雷霆 馬刺密謀撬埋杜蘭特
馬刺喺NBA季後賽西岸4強作客以100比96擊敗雷霆，場數領先2比1，賽前仲有消息傳出，原來馬刺已準備好喺今個夏天，加入雷霆球星杜蘭特嘅爭奪戰，唔好理到底係咪放煙幕，恐怕都會影響杜蘭特往後嘅比賽心理狀態。
李安納同艾迪列治合共攻入55分，帶領馬刺喺第4節關鍵時刻拉開分數。另一方面，杜蘭特有26分、3次助攻同5個籃板，韋斯布克有31分、8次助攻同9個籃板，但由於全隊有多達14次失誤，注定雷霆要接受輸波現實。
拍李安納同艾迪列治組「新3巨頭」
最近有報道話巫師、塞爾特人同勇士都想喺今個夏天，拉攏雷霆球星杜蘭特加盟，但美國傳媒透露，近排馬刺正低調地研究，點樣可以騰出薪酬空間，期望成為杜蘭特爭奪戰嘅最終勝利者，搵佢拍李安納同艾迪列治合組「新3巨頭」。
騎士獵鷹 贏多場晉級
同日，騎士喺東岸4強作客以121比108擊敗鷹隊，場數領先至3比0，再贏多場就可以入東岸決賽。除咗勒邦占士同艾榮各自攻入24分，路夫都有21分、3次助攻同15個籃板，當中更包括射入5球3分，協助騎士輕鬆贏波。