馮凱文最緊要有Heart

狂傲如莫連奴，也有英雄落難時、教練從來不易做！季初遭逢15場不勝的馮凱文自然清楚不過。「做得這個位就要承受批評，球圈前輩教落，最重要問心無愧。」帶領南區升班首季便獲膺最佳教練，當時的他只有36歲，「領軍」經驗卻已長達15年。自知沒有過人天分，馮Sir馳騁港甲兩年便引退，轉個彎，前路更廣闊。

「大頭文」為男拔贏盡錦標

「我19歲便考教練牌，當時走得比人早，算係幾馨香。」執起教鞭首個任務，便是率領母校賽馬會體藝中學征戰學界精英賽，麾下大將包括自詡「天才」的李志豪，難怪馮Sir謙稱以當時陣容，「唔使點教都贏」。此後轉教傳統名校拔萃男書院，16年來屢創佳績，獎盃的意義比不上身教重要。「心態決定一切，細個唔教好，大個好難教。試過有比較反叛的學生經我教導後反省改過，依家畢咗業，依然不時問我意見。」每逢男拔捧盃，學生總會擺出招牌「大頭」手勢答謝花名「大頭文」的馮Sir，打成一片，卻不失嚴師本色，如果有同學講粗口，就要罰做掌上壓。

曾榮獲港甲最佳教練殊榮。

元朗季初15場不勝，可說是執教生涯的最低潮。

為了見證兩名幼子成長，去季帶領南區取得升班資格後，馮Sir一度考慮謝絕球會職務，卻被元朗主席王威信打動。「王生當時只係講咗一句——『你係專業，你嘅意見我都會聽』。結果佢冇食言，試過第一場聯賽同佢會報排陣同戰術，佢話全交由我決定，即使15場不勝，都冇畀壓力我，但成績欠佳，我都過唔到自己嗰關。」面對教波以來最難過的難關，馮Sir曾在操練時化身聖誕老人送禮搞氣氛，又不時細心聽取球員意見，放下帶校隊時的嚴肅一面。

成功感來自亦師亦友

元朗陣中主力如葉頌朗、曾昭達、邱于銘等，早在中、小學已與馮Sir結下師徒緣，曾是「大肥仔」的陳卓光更被馮Sir鍛煉出手榴彃絕技；說到「高徒」，不得不提創造女帥捧盃歷史的「牛丸」陳婉婷。「『牛丸』比我有較多甲組隊經驗，我不時反過來聽她意見。教練、助教同球員，應該互相欣賞尊重，不應分高低。」這份亦師亦友的成功感，馮Sir直言是教波以來最大得着。以為身兼男拔中、小學校隊及元朗主帥三職為搵「奶粉錢」？那便大錯特錯：「要發達就唔應該去教波。無論幾忙我都冇諗過放棄教校隊，因為我想畀學生知道，學做人緊要過學踢波。」比賽輸贏只有90分鐘，永不放棄的態度，卻受用一輩子。

文：KaKa