陳偉豪領袖魅力話你知
能夠戴起隊長臂章，當然要有隊長風範，今屆省港盃年僅19歲的陳俊樂出任港隊隊長成為一時佳話，但唔好忘記香港隊同南華仲有位熱血隊長陳偉豪！其實隊長一職並無任何特權，亦唔一定最好波，最重要是隊友受落，早前南華在幾場大戰失利，危急關頭更加需要「偉豪」這位好領袖，帶領隊友迎接新挑戰。
陳偉豪的領導才華在讀書時代已顯露出來，雖然未做過班長或風紀，但在足球上表現突出，因此做過小學校隊隊長。「我讀書成績差，在課室根本沒人聽你講，反而出到球場，由於我比較容易與人溝通，又鍾意搞gag講廢話，所以有機會做校隊隊長，入選香港青年軍之後，亦試過同李志豪輪流做隊長。」
張偉康高尼路好榜樣
中學時期陳偉豪在體院受訓，沒有踢過中學校隊，卻在體院遇上足球生涯第一個好隊長，就是已退役的「肥康」張偉康：「體院的階級觀念很重，教練亦很嚴厲，比我年長的隊長『肥康』很維護後輩，畀教練鬧完，佢會呵番我哋，直至多年後當上隊長，我都一直記住。」
成為全職球員後，「偉豪」遇上另一位影響他至深的隊長，就是當年入籍香港的巴西中堅高尼路。高尼路以隊長身份率領港隊出戰亞洲盃，他的熱血精神令「偉豪」深受感動：「當年港隊在國際賽成績並不突出，記得有一場對卡塔爾我們落後三球，全場只有他繼續鼓勵隊友，要一支輸到『頭耷耷』的球隊再抬起頭是很困難的，高尼路當時的表現令我印象深刻。」
良好溝通建立信任最重要
經過10多年無數次磨練與考驗，陳偉豪於4年前成為了港隊與南華「雙料隊長」，亦掌握了做個好隊長的竅門：「做隊長唔一定係最好波，亦唔會有任何特權，我覺得隊長職責最重要係同隊友保持良好溝通，只有溝通，才可建立信任，才會有默契，尤其是香港隊的入籍外援及國援，我會主動與他們熟絡。」他笑說：「可能有時太過火，現在有些隊友例如黃洋都嫌我煩呢！」
南華近期在聯賽及銀牌連場大戰敗北，陷入低潮，陳偉豪更自覺責任重大：「球隊任何時候必須要保持正面樂觀的態度，有時輸波亦是好事，因為可以從中找出問題所在，收復失地。」
圖/文：黃兆崑