每次介紹內地模特兒時，都會聽到有啲人話佢哋的確樣靚身材正，但係形象個個差唔多，好難分辨出係邊一個。不過呢個問題肯定唔會喺李思寧身上發生，事關佢不但擁有迷人樣貌同激凸身材，而且經常以唔同形象示人，令大家對佢留下深刻嘅印象。
今年24歲嚟自四川嘅李思寧，有個相當特別嘅英文名叫SiByl，唔識讀佢個英文名，唔緊要，皆因從改名呢點已經睇得出佢係個相當識得突出自己嘅模特兒。此外，佢經常以唔同嘅形象示人，可以話係個百變女模。要講述佢嘅百變之路，一切就要從2009年開始講起，當年佢係業餘模特兒，可惜發展一般，之後佢決定全身投入模特兒界，推出寫真集，走青春美少女路線，同時參加多個選美及模特兒比賽，獲得優異成績，人氣上升，漸漸廣為大家認識。
及後，佢大膽地以超性感形象於寫真集中亮相，火辣身材不但帶畀大家極大嘅視覺衝擊，亦令佢嘅名字火速喺網絡上傳播開去，更擔任遊戲展嘅Show Girl，以及以車模身份喺車展中為汽車品牌站台。雖然人氣極速飆升，但係思寧有感未足以突出自己，於是佢喺造型上搞搞新意思，先後化身成比堅尼女郎、旗袍美人、金髮娃娃等，甚至剪短髮以清爽造型登場，以唔同嘅美態攻佔大家嘅眼睛。
作為模特兒最重要就係識得鞏固自己嘅粉絲團，思寧深明呢個道理，經常喺微博同粉絲進行互動外，又實行福利政策上載超性感寫真。如果覺得咁仲未能反映出佢同粉絲關係有幾好嘅話，可以從粉絲為佢改花名呢件事中得知一二。原來粉絲最愛稱呼佢做「司令」同「檸檬」，前者係因為覺得佢有種女王氣質，而後者則係因為佢予人活潑又清新嘅感覺。對於呢啲花名，思寧表示：「喜歡你們（粉絲）叫我司令因為威武霸氣帥！喜歡你們叫我檸檬因為活潑清爽萌！」
大部分模特兒為咗保持清純形象，經常展現乖乖女一面，不過思寧卻啱啱相反，鍾意展現自己愛玩愛蒲嘅性格，佢坦言：「不是我愛玩，只是我修心過後卻沒有好結果。」有粉絲分析，阿妹呢句說話係咪講緊自己嘅愛情觀呢？事關男人都唔希望女友經常去玩，而佢曾經因此而修心養性卻冇好結果呢？當然講到愛情史，就要問佢先至最清楚喇！
簡介：李思寧嘅百變形象每次都會帶畀大家新鮮感，與此同時證明佢嘅可塑性相當高，令人十分期待佢下次會帶畀大家更多驚喜。當然留意佢嘅寫真同時，同樣唔可以錯過佢嘅近況，等大家可以更加深入認識佢。
網址：www.weibo.com/SiNingMiss
出生地：四川
身高：166cm
三圍：33、24、33
撰文：魂