范俊業11·17永難忘

「港中大戰」在11月17日輪迴重演，結果同令國足跌入萬丈深淵。「其實那場波好尷尬，當時港隊早已出局，狀態與準備都好差。賽前兩個星期已有記者不斷問我會否『放水』，老實講，我有一刻動搖過，但如果我幫，我咪即係打假波？」回想11年前的「成名作」，救出鄭智12碼的「豬仔」范俊業歷歷在目。作為門將，7次從龍門拾回皮球的滋味絕不好受，偏偏卻被加諸罪人之名，「豬仔」也不禁笑言「好得意」:「其實佢哋（國足）只要一早咁打，使乜賴落我哋度？」

飛馬港隊兩邊忙

今日一眾港腳成內地列強搶手貨，當年「逞強」的范俊業也幾乎加盟中超球隊，卻因家事擱置留憾。「冇話錯唔錯過，自己得唔到，都希望後輩可以得到。依家阿輝（葉鴻輝）已超越我，中超唔得，便試試J2、泰國，我相信佢有朝一日可以做到。」英雄光環難永恆，拒絕留戀場上光輝的「豬仔」在33歲便掛靴，現時出任港隊及香港飛馬門將教練。在香港飛馬除訓練門將，還不時聲嘶力歇指導場上球員；去到港隊更要化身「訓導主任」，每晚11時「Check房」。即使去季在南華經歷炒魷冤屈，仍無損雄心壯志：「龍門教練喺我個年代仲未普及，冇人去Push你，難免會偷懶，我比較好彩係可以喺德普洛夫（前愉園俄羅斯門將）等出色外援門將身上偷師。無論係球會定個人榮譽，我都攞過晒，寧願早點退落嚟，培養接班人。」

10個龍門9個傻

門將命運，往往天堂地獄一線間。嘗遍起落的「豬仔」甘願代替門柱，成為門將「最佳好友」，細心觀察眾將情緒與性格。「當紅時失波，冇人會話你。但你低潮時，就算畀人射入世界波，都會被抽秤。守得龍門，就要死好多細胞。我哋門將之間有個Whatsapp群組，互相鼓勵了解。」在訪問期間飛撲拍照，即使只是「擺甫士」，已成范Sir的「豬仔」仍把握機會為飛馬小將袁皓俊糾正姿勢。常說10個龍門9個傻，外表斯文的「豬仔」笑言並非例外，也許執着與傻勁，只是一線間。

圖／文：Kaka　（部分照片由受訪者提供）