李康廉浴火重生

「有邊個唔想踢香港隊吖!」曾經也是港隊鋒線中堅分子的李康廉說來平靜,眼中卻隱約有火。走過傷病低谷,戰勝質疑冷眼,「康廉」今季在東方鳳凰重生。昔日脆弱的「玻璃心」久經歷練磨成鋼,康廉始終保持沙頭角人的樂天知命,衝破年齡障礙不言退!

「打咩波都一樣,最緊要係有信心!」康廉拿起「Cue棍」有板有眼,不失近期門前殺手本色:果斷利落,與上季相比判若兩人。「當時傷完好一點又再復操,但原來條筋已經斷咗,狀態反反覆覆,心情好差!」決心接受手術捲土重來,豈料再迎噩耗──太陽飛馬易主改組青春班。後來有機會加盟另一港超班霸,臨門又遭質疑難返高峰被棄,康廉化悲憤為力量,終獲東方賞識:「有一剎那擔心會落不到班,但我不甘心就此退下來,只好自發每周健身3、4次,重拾肌肉力量。如果沒有踏出這一步,今天未必可重拾狀態。」

沙頭角街場無師自通

隨大埔升班以前,康廉曾從事救生員、跟車、文書工作。9年球員生涯,贏盡本地錦標,當過港隊主力,不過最留戀的還是球迷掌聲與認同:「最開心係大家enjoy睇我踢波。」為了生活,昔日並肩征戰甲組的沙頭角「巴打」,早已放棄綠茵夢,就連胞兄李威廉,今季亦退任香港飛馬助教,僅餘康廉孤軍作戰。

「呢啲係級數所在!」說笑背後,少不了自我鞭策:「當時怎想到會踢到職業?我們未受過正統訓練,連最基本控球也未學過。直至轉投飛馬,才每日提早去到球場,找隊友幫手做傳球練習。話說回來,伊達好像嫌棄過我技術麻麻,後來卻做了最佳拍檔!」

想學三浦知良踢到48歲

沙頭角禁區逐漸解放,康廉亦已搬出市區成家立室,淳樸本性卻依然不減:「沙頭角人最鍾意熱鬧,街頭鄰里坐喺舖頭吹水,呢種親切感覺喺其他地方搵唔番。」唯一改變是愛子浩朗出生,令康廉添上責任感:「試過去內地集訓10日,老婆怕阿仔不認得我,要我離遠偷望,搞到我心掛掛。」有了最強後盾,康廉更加珍惜當下:「只要作息定時,年齡絕非問題。三浦知良48歲仲踢得,我才32歲算甚麼!」

文/圖:Kaka

場地提供:Ivan Snooker