意外頻生格電騎士麥克歷最傷
次天賽事繼續意外頻生！昨晨舉行的格蘭披治電單車排位賽，英國車手麥克歷駕駛其90號電單車，於準備右轉文華東方灣時失事，戰車撞向護欄後再反彈出賽道，而麥克歷則整個人飛向護欄再反彈落地，久久未能起身，最終由救護員抬上救護車送往醫院急救。麥克歷事後證實嚴重受傷，左肩胛骨同左右肋骨都有多處斷裂，需要留院深切治療部。
髮夾灣出現「串燒三兄弟」
此外，CTM澳門房車盃排位賽3號車澳門廖力嘉，一次入彎時由於車速過高，竟從後飛越前車再翻側，四輪朝天而且仲有煙冒出，其後到來嘅車手皆停車及趕往幫手救人，幸好廖力嘉能自行爬出車廂，而賽會亦出示紅旗暫停賽事。國際汽聯GT世界盃排位賽亦發生意外，5號車嘅澳門車手古圖，喺入彎時突然失控，先後撞向兩邊圍欄再打咗幾個「白鴿轉」先停下來，戰車嘅車頭同車尾都嚴重損壞，古圖事後一直留在車廂裏，直到工作人員到場才離開車廂。
到咗F3排位賽又再出現意外，首先係10號車、英國車手伊洛特，喺高速入彎時失控撞向圍欄，左前轆差啲甩埋出嚟，幸好伊洛特可自行行出車廂。其後髮夾灣更上演「串燒三兄弟」，三架戰車因收掣不及首尾相撞串埋一齊，令其後駛至的車大排長龍，好彩兩宗事故都冇選手受傷。