波場快拍
鹿角6奪日聯盃
鹿島鹿角昨午於日聯盃決賽憑黃錫鎬、金崎夢生及卡奧盧卡斯下半場連轟3球，3比0大破大阪飛腳，歷來第6次捧盃，36歲嘅鹿角隊長小笠原滿男賽後獲選為最有價值球員。現場採訪嘅有線足球評述員劉健基賽後訪問了入波功臣卡奧盧卡斯及有「日職經理」之稱嘅宣傳大使佐藤美希。
恒大5連霸
中超昨午煞科，FC廣州（廣州恒大淘寶）作客2比0擊敗北京國安，成為史上首支聯賽5連霸球隊。賽前唔少球迷都要撲飛見證呢個歷史性時刻，據報門票炒貴四倍依然供不應求。恒大嚟緊周末會喺亞冠盃決賽首回合作客阿聯酋嘅阿爾阿里，力爭雙冠王。今場亦係國安老將邵佳一嘅職業生涯告別戰，佢喺賽後繞場一周接受球迷掌聲，隊友仲將佢拋起，恒大球員亦有同佢握手道別。
諾高平13度封王
瑞典超昨晚進行煞科戰，榜首嘅諾高平作客憑住前鋒伊馬古祖域同中場泰斯達臣上下半場各建一功，以2比0擊敗最終只得9人應戰嘅馬模，第13次贏得聯賽冠軍，追平哥登堡嘅紀錄。哥登堡主場只能同卡爾馬踢成2比2保住第2位，AIK蘇納作客1比1打和奧雷布洛攞到聯賽第3。