快艇群星與眾童樂

快艇大軍昨日浩浩蕩蕩殺落上海平治球場，出席關懷活動，向60位來自上海洋涇菊園實驗小學嘅「籃球小將」傳授必殺技。中鋒迪安迪佐敦甫到場便成為焦點，只見佢大啖大啖食爆谷，場面惹笑。

皮雅斯變身模範老師

及後D佐敦、格芬同祖斯史密夫3大內線被編埋一組負責做教波。不過，3大球星指導完一輪，就個個掛住喺度埋頭篤機，偶爾提幾句，而當中以祖斯史密夫最「專心」，全程9成時間喺度撳手提電話，好彩班同學仔悟性都幾高，可以「自動波」完成個訓練過程。

活動後唔少得嘅係嚟個開心大合照。

格芬舉手投足都咁有星味，成為全場焦點。

同3位大星相比，撞正今日38歲牛一嘅皮雅斯就最落力，喺學生仔面前做個模範老師，上籃、射波、步法樣樣教到足，活動結束後更加身水身汗。另名宿朗夏巴即使左手有傷亦未有「揸流攤」，同學仔們個個都畀個Like佢呀！

CP3紮住食指齋吹水

另外，於深圳賽前手指骨折的快艇控衞基斯保羅，昨於雖喺關懷活動現身，但只係齋企吹水，食指仍然包紮着，雖然教練李華士稱CP3傷勢未有預期般嚴重，但預計上海站賽事未必會冒險上陣。至於在練波時撞甩牙的奧斯汀李華士則好彩並無大礙。

快艇與黃蜂明晚將喺呢個平治球場再決高下，雙方今日會再一有一課公開操練，預計仍會吸引一大班追星族前來「參觀」。