不丹並非旅遊國家，每年旅客限額只有10,000人，小弟有幸成為當中的萬分之一實在好感恩，因為今次剩係申請入境簽證都已經一頭煙，要填好多份表，簽好多個名，幾乎要寫埋「三世書」先至出到機票，打聽下先知原來之前發生過多次「騙案」，不丹政府被「老點」無數次後，決定推行嚴格入境措施。
《警訊》話齋「騙徒行騙手法層出不窮」，香港咁多醒目仔女都不時「領嘢」，民風淳樸的不丹點會唔中招。至於所謂騙案，就要講番不丹旅遊政策，為保護零污染純天然野生環境，每年旅客人數設限為10,000人，而且每人每日規定消費大約200至250美元，當中30%為不丹政府稅收，而騙案就此出現，好多外來人為咗逃避稅款，就巧立明目自稱公幹、假冒記者，但係入境之後實際上係嚟玩。
辦不丹簽證手續真係好繁複，但只要交畀旅行社代辦，例如搵不丹航空的香港總代理PAM Holidays，就可以一條龍幫你搞掂晒，至於小弟以記者身份入境就係另一回事，公司信、足總擔保、旅行社擔保，仲要寫埋本人詳細履歷，臨出發一星期再簽多兩封公司證明先至搞得掂，所以話今次不丹之旅，確實唔簡單。