蘇格蘭體壇噩夢日

梅萊近年大滿貫最差戰績

梅萊苦戰逾四小時出局！美國網球公開賽16強賽事，2012年男單盟主梅萊被狀態甚弗的南非球手奇雲安達臣「偷雞」成功，梅萊終以1比3落敗，寫下近5年在大滿貫賽的最差戰績。反觀瑞士天王愈戰愈勇，以3比0拍走美國「高佬」伊士拿，殺入8強，兼連續12次在美網對着美國球手都贏波，堪稱「美．男殺手」。

梅萊與15號種子奇雲安達臣激戰四局，但受制於後者全場開出25個Ace的強勁發球，最終奇雲安達臣以7比6（7比5）、6比3、6比7（2比7）、7比6（7比0）爆冷勝出，這更是梅萊自2010年美網後，近5年間第一次在大滿貫16強止步。

賽後這位3號種子難掩失望：「3盤打到決勝局，最終出局實在失望，因為要取得在大滿貫賽事的穩定性，背後是經過很多很多功夫的，可能是早幾場波都比較劇烈，導致今仗有點力不從心。」兩星期前贏得職業生涯第三冠的安達臣，則形容今次是其代表作，近態甚弗的他更成為近23年來，首位打入美網8強的南非球手。

費達拿做「美．男殺手」

34歲的費達拿如能捧盃，便會成為自1970年以來，最老的美網盟主。昨仗他全場控制戰局，以7比6（7比0）、7比6（8比6）、7比5報捷，8強將對陣法國基斯昆特。力爭第六度在美網捧盃的費天王說：「伊士拿是數一數二的發球好手，很高興本仗能打出自己最佳水準，亦期待8強戰來臨。」以往費達拿與基斯昆特對賽16次，取得14勝2負，下仗的贏面亦較高。至於另一位瑞士球星華連加亦順利闖關，淘汰楊格而殺入半準決賽。

女單方面，「縮胸少女」施蒙娜及前溫布頓冠軍姬維杜娃，分別擊敗列絲琪及歌達，齊齊打入最後8強。（now676 周四凌晨零時直播）

男足奮戰2比3輸德國

當英格蘭提前出線，威爾斯同北愛爾蘭亦喺所屬小組排榜首等晉級，蘇格蘭就慘成英倫三島唯一「甩轆」球隊。昨晨佢哋喺D組大戰主場2比3不敵德國後，距離第3位嘅愛爾蘭4分，最後2輪除咗要自己爭氣，仲要望愛爾蘭失分，要重演1958年世盃「英倫4隊」齊踢大賽決賽周嘅盛況唔樂觀。

蘇格蘭上星期輸畀格魯吉亞係致命傷，今場迎戰世界冠軍德國，連蘇格蘭Icon費格遜都特登入場打氣，其實佢哋今場表現唔錯，即使兩度被湯馬士梅拿攻破大門，但蘇格蘭仍憑無比鬥志兩度追平，可惜最終都畀根度簡轟入致勝球，主場慘輸2比3，近3場分組賽只係拎到1分，陷入出局邊緣。

費Sir入場打氣都冇計

領隊史特根賽後表示：「相信我，蘇格蘭仲未絕望！球員今場嘅表現令我覺得光榮，只要佢哋可以保持呢種決心，加上少少運氣！我哋會拚到最後一刻！」相比蘇格蘭，F組嘅北愛爾蘭的確好運，佢哋同日主場只與匈牙利打成1比1，但仍以17分排喺榜首，最後兩輪只要贏1場就鐵定出線。

雖然蘇格蘭同英格蘭血脈相連，不過英國《每日郵報》尋日公開「英超人口普查」，發現528名球員當中只得15個蘇格蘭球員，反而鄰國法國有37個球員，成為英格蘭本土球員外第1入口大戶，西班牙（33人）亦多佢哋一倍以上，而且費查、侯頓、韋達卡等都係「三張嘢」球員，蘇格蘭唔想被賴低就要爭氣啦！