港足有Heart我哋收貨！

旺角場變一片紅海

賽事門票早早售罄，大部分球迷穿着紅衫入場，令旺角場變成一片紅海。世界排名94的卡塔爾比香港高57位，港隊開波即穩守，但首個具威脅的攻門卻來自港隊，8分鐘麥基接應隊友傳送於左路殺入禁區，遇對手剷跌，惜南韓籍球證未有判罰。不過，卡塔爾卻憑球證另一個爭議性判決間接開紀錄，球證指港隊門將葉鴻輝於禁區內拖延時間，判間接自由球，輾轉成為右路角球，身高1米87的前鋒保迪夫禁區邊接應跳頂破網，卡塔爾領先1比0，完半場前港隊以高梵入替盧均宜，但未有建樹，卡塔爾領先半場。

易換後港隊以徐德帥入替陳肇麒增強活力。雙方快打快，製造不少埋門，下半場15分鐘，港隊再以安基斯入替麥基，但換人後立即再失守。卡塔爾左路快攻，後衞法拉拿禁區邊快腳抽射，皮球射穿黃洋及積施利中間的罅位直入死角，卡軍領先至2比0。港隊落後之後加強進攻，力圖收復失地，令後防暴露更多空位，導至84分鐘再失第3球。

角球攻勢連下兩城

不過港隊未有放棄，先後於87及89分鐘把握兩次角球攻勢，由白鶴及高梵門前建功追成2比3，為球賽掀起最後高潮。可惜儘管全場球迷大嗌「We are Hong Kong」，但仍不足以助港隊追和，最終輸2比3，完場後全瑒掌聲雷動，足證球迷對球員的表現收貨。

同晚同組中國3比0勝馬爾代夫，與港隊同得7分，卡塔爾則以9分升上榜首。