孫玥:湊女難過打排球

昔日以拚搏打法被封「小老虎」的中國女排名將孫玥,做了母親後未有成為「虎媽」,反而變成一位慈母。面對兩個寶貝女,孫玥坦言有時「冇佢哋咁好氣」,更表示湊女比打排球更辛苦,但就有「特別的湊女技巧」,亦會利用教波及上教練課的機會趁機「抖吓氣」。部份圖片:Eden 文:鄒映君

曾是90年代中國女排代表人物的孫玥,退役後跟隨丈夫何國文來港定居五年半,全心全意湊女:「大女嘉琪四歲幾,細女嘉睿兩歲多,老公工作又忙,未能幫手,我很多時候都忙於湊女,好少私人時間。」

唔做怪獸家長催谷囡囡

孫玥自稱有「特別的湊女技巧」:「大女比較硬頸,更是為no而no,例如叫她做功課,她會說『我唔做喎!』,所以想她做一件事,我會話『你唔好做呀』,她就會肯去做。」至於細女,反而懂得「睇人面色」:「細女比較黐身,見到我嬲,就會氹我『媽咪,我會乖,我下次唔敢。』所以老公經常話我好縱個細女。」

現今「怪獸家長」當道,孫玥又會否「順應潮流」,為囡囡報讀大量興趣班?「兩個都非常好動,都想她們學打排球,她們身形高大,不打『好嘥』,但要等再大一點先學。大女正學游水,而跳舞和畫畫是因為她喜歡才去學,上補習班就只有學英文。我只想她們開心健康成長,現在香港小朋友都被過分催谷,真是替他們辛苦,其實未來有很多出路,不一定要靠讀書。」

復出球壇打波當抖氣

雖然兩個囡囡活潑又可愛,但每天忙着照顧她們亦難免會生厭,因此孫玥去年開始「復出」排壇:「除了跟本地一支甲二球隊一起打波外,現時亦在拔萃女書院擔任兼職排球教練,剛剛就完成國際一級教練班課程。」不過無論是打波、教波或上堂,大前提是有人幫手湊女,否則就不會外出,果然是廿四孝媽咪!

相比起湊女,她覺得教波一點也不辛苦:「班學生打波好用心去學,所以我會很有耐性、不厭其煩地講解。反而對囡囡會比較心急,有時會非常忟憎,就會離開屋企一陣,冷靜一下,所以出去打波同教波,都是讓我抖抖氣的機會。」實在不得不說句,為人母親甚艱難呀!