方駿宇叻過A貨咸美頓
狀態甚弗的香港「90後車神」方駿宇（Adderly），昨於GP3英國站排位賽再創佳績，即使被賽會突擊檢查戰車，以致鬥少了約2圈時間，但仍以1分47秒620奪得第7位，創下今季排位賽最佳名次，表現比同場鍊車的威爾斯焦點車手、「A貨咸仔」馬頓保更標青！
Adderly：慢慢進步中
代表Koiranen GP上陣的Adderly，上周五在練習賽排第9，昨午排位賽表現有所進步，雖然第1次入維修站時被賽會突擊檢查，量度車重時因電線問題一度被阻，但Adderly返回賽道即時搏命，最後造出今季最佳排位成績，僅落後頭車0.58秒，首回合排第7位起步。「開頭畀人磅重，本來可以Push（推）多一圈，但係最後冇呢個機會。不過，我覺得自己對架車嘅感覺敏銳咗，更加合拍，慢慢咁進步。」
馬頓保打機打到變車神
至於由「機霸變車神」的馬頓保則失準，排位賽只造出1分48秒204，首回合排第14位起步。這位來自威爾斯的23歲車手於2011年憑PlayStation賽車遊戲Grand Turismo（GT）成名，去年更贏得GP3分站冠軍，成為車壇超新星。雖然其外貌、聲線與平治「黑帝」咸美頓似到十足十，但馬頓保話要「做番自己」，這位被英媒列為全球50大最具市場價值運動員回應：「好多人都話我似佢，咁我個樣同把聲就係咁嘛，是但啦，哈哈……不過我只係想做番自己。」
希望兩年內可闖入F1殿堂的馬頓保又說：「每個F1車手都有值得欣賞嘅地方，好似咸美頓跑法好有侵略性，係我心中英雄；拉哥倫就場內場外都好有個性，維度爾就夠謙遜全面。」「A貨咸仔」和方駿宇今日香港時間下午3時25分上演的次回合將再同場比併。