夏天又嚟啦，咪以為靚女大多數都係鍾意曬太陽，不會參加水上活動。事實上，一班極限運動滑浪索女巾幗不讓鬚眉，專門挑戰巨浪作高難度動作，誓要同男子運動員睇齊之餘，亦要戰勝自己。除咗樣靚身材正，其中唔少靚女更有世界冠軍銜頭，非但吸引贊助商的青睞，有啲仲係Model界、珠寶界同時裝設計界嘅精英，甚至擁有自己嘅品牌，絕對唔係浪得虛名！
Quincy喺美國紐約長島蒙托克區出世，放學時就去屋企「後園」——海灘游水，加上受熱愛滑浪嘅家人影響，Quincy年僅7歲就開始滑浪並且參加賽事，由於呢類業餘賽事係以年齡分組，但巾幗勝鬚眉，Quincy往往能擊敗同齡男孩稱霸，優秀嘅潛質令佢畀時裝品牌Volcom看中，12歲已獲得贊助，幾年間累積不少男Fans，2013年更獲Volcom邀請，合作設計2014春夏Quincy嘅個人系列。Quincy表示自己拒絕造作，所以不認同「滑浪女」化妝上陣，平時只會搽防曬。
Anastasia Ashley 5歲已經接觸滑浪，7歲已經搵到贊助商贊助滑浪板，03年以16歲之齡贏得年度最佳新秀三冠王，同年又勇奪首個全國大賽冠軍，其後更於美國衝浪冠軍巡迴賽稱后。14年獲美國《體育畫報》邀請拍攝一輯泳裝火辣照，索爆身材令其人氣再度急升。Anastasia現時除咗係運動員同兼職model，仲同珠寶公司合作推出自己品牌首飾，又曾於綜藝節目《地獄廚神》亮相，一於實行多線發展。
Laura細個時原本由媽媽訓練，以體操運動員作為目標，但於澳洲悉尼土生土長嘅Laura，受電視上嘅滑浪高手英姿吸引，9歲向媽媽提出要學習滑浪，2004年只得12歲更遠赴夏威夷參加滑浪訓練營，4年後成為當年國際滑浪協會青少年冠軍，並成為當年的最佳新秀。2011年18歲轉玩職業賽，現時世界排名第10。Laura除了滑浪外，還兼職模特兒工作，甜美伸脷笑容成為其Icon。
Alana曾經參加ASP世界巡迴賽，於Fb及Ig分別獲得160萬個Like及110萬粉絲follow，人氣爆燈。但別以為Alana只係Sell樣，其實佢喺05年T&C Womens Pipeline Championship短板奪冠，其後又贏過Women's Pipeline Championships，贊助合約多不勝數。可惜，Alana早前宣布因想稍事作息，所以要暫時告別滑浪事業，一眾「浪迷」想看到英姿，恐怕要再等多一段日子。
滑浪壇一姐吉爾莫（Stephanie Gilmore）被喻為滑浪界難得一見嘅天才，於2007-14年曾6度奪得世界職業滑浪協會世界冠軍，亦曾於2010年勞倫斯年度世界體育獎、2011及13年《ESPY》年度卓越體育表現獎兩大頒獎禮上，分別榮膺最佳極限運動員。難得的是Stephanie名氣雖大但毫無架子，積極參與不同嘅慈善活動，更助養兩名非洲小朋友，認真愛心爆棚。
菲茨吉本斯（Sally Fitzgibbons）早於6歲已開始參與滑浪，於2007年更以14歲之齡勇奪世界職業滑浪協會世界青少年錦標賽冠軍，創下賽事史上最年輕冠軍得主的紀錄。Sally雖然多次與世界冠軍寶座擦身而過，但無礙其瘋狂「吸金」能力，除獲得紅牛、三星及不少滑浪品牌贊助外，仲撈過界推出專屬滑浪手機應用程式「Sally Fitzgibbons Surfing」，除了可以吸納更多fans外，更可以賺多筆。
Maya 13歲時已接觸滑浪運動，15歲到訪「滑浪勝地」澳洲磨練技術及學英文，為踏足滑浪界做好準備。曾贏得多次Billabong XXL全球滑浪大賽冠軍。保持女子最高滑浪紀錄（2009年，45呎）嘅Maya，多次「玩命」挑戰高難度，縱使搞到周身傷，2013年幾乎喺葡萄牙浸死，但無損其雄心壯志。擁有魔鬼身材的Maya最近獲瑜伽品牌Lululemon贊助，又得到《ESPN》雜誌邀請拍攝全裸美感相輯，一躍成為全球最高薪女滑浪運動員，認真巴閉！