今日修頓開波喇！18精英Dunk場

18強隊困獸鬥爭上位！比賽作為未來之星搖籃，DUNCAN惠龍兒、周健宏、莫家俊、劉凱濤、留棟梁等現役香港代表隊及甲一球星，都曾參賽留下光彩，且看今屆誰能彈出。

MVP巨獎爭崩頭！男、女子最有價值球員，除獲贈尼馬代言的至潮攝錄機，以及adidas新款球鞋之外，暑假更可免費參加新加坡遊學團，衝上雲霄。

分組形勢

放大圖片

籃球聖地大踩場！大裝修兼換了地板的修頓室內場，擁1,995個座位乃氣氛最正的「籃球聖地」，學界球隊鮮有機會踏足，特別是新界區學校「初登大舞台」，如「青中」、宣道、崇真、可譽及李賢堯等，興奮感刺激「戰力升呢」。

人氣爆燈的阿Bob開咪！做戲你睇過，但原來佢打籃球都有一手，阿Bob會出席31日舉行的表演賽兼「出口術」撐警察隊，唔睇走寶。

觀眾入場唔係齋睇，射籃遊戲畀「波癮發作」的現場觀眾一試身手，兼送出潮爆adidas JLin波鞋畀勝出者。

男拔靚仔射手安家仲雄心壯志，話繼打破名將潘志豪在NIKE LEAGUE的單場得分紀錄後，再要在旁述潘志豪面前拿下本屆賽事做得分王。

NBA巨星杜域侯活帶領火箭升空殺入西岸決賽，「喇沙侯活」張浩田亦受到激勵，Howard聯袂「Captain」廖鈞浩「孖浩」出擊，勢要做「科騷」。

導演葉念琛現身修頓，頒發獎座予首屆「籃TEEN微電影大賽」冠軍學校，分享自己讀書那些年趣事。

緊湊賽制包括初賽及4強採上下半場各10分鐘，球員一落場就冇得Hea打，如果打和仲不設加時，鬥快射「黃金入球」定生死，刺激指數10盞燈呀！去到決賽才打4節各10分鐘。

兩大男神教練香振強及呂楚威，分別帶領李賢堯男籃及可譽精兵分途出擊，且看兩支地區新勢力能否爆驚喜賽果，而翁金驊更一人帶漢華男女及桂華山，勁考功力。

協恩主力謝亦霖及桂華山的朱浩雯，分別贏過2011年女子「3分王」及2013年男子「3分王」，兩大遠射能手今年再參賽，唔知會唔會再贏個人獎呢？

「青中」中華基督教青年會中學有神奇校長陳錦偉「發功」，發動全校睇波團，大家想睇吓佢哋氣勢有幾勁。

表演賽鐵膽籃總名人隊亦有多名甲一猛籃助陣，福建「流川楓」鄭錦興、大隻佬張偉康等齊獻技。

「豪裕」講波經，球場內外合作無間的永倫球星潘志豪及蔡芳裕，擔任大會現場直播旁述，而籃壇「分唇」當紅司儀吳毅豪Patrick更出任MC，決賽日大搞氣氛。

桂華山好似中咗「阿三魔咒」，連續7年都係得到季軍，今年球隊加入「MJ」莊智存這位高大中鋒鎮守內線，佢哋話唔入決賽唔罷休喎！

賽會精心炮製場刊及入場贈送的福袋內有乾坤，飲品食品乜都有，免費睇好波仲有嘢送，只此一家！

裘記「美少女隊長」岑紫冰擔當場刊中間大頁Poster的主角之一，仲有寶覺的型男隊長加爽朗女隊長，以及蒙民偉書院「歌神」劉錦富飛躍爆籃，完美演繹「Go！Fight！Win！」精神。

唱哭腔而爆紅的歌星李逸朗，打籃球多年身手了得，在表演賽中他在HunterZ及少女標本等美女打氣下，誓打場好波回饋Fans 。