畢拿助公牛殺入季後賽
「咕喱之王」復出即幫公牛殺入季後賽！公牛球員向來「命苦」，主帥泰保杜「做死人」領軍方針一直備受爭議，「咕喱之王」占美畢拿尋日傷愈復出就要打夠40分鐘，公牛得以喺主場98比86擊敗黃蜂，提前鎖定季後賽資格。
場均上陣38.9分鐘 聯盟最多
環顧聯盟上陣時間，占美畢拿目前以場均38.9分鐘拋甩艾榮、占士夏登及勒邦占士，暫列NBA「咕喱之王」。呢位公牛小前鋒早前因手肘受傷休戰3個星期，尋日首度復出即被主帥泰保杜「用到盡」，出戰40分鐘並貢獻19分及9個籃板，協助公牛以12分大勝黃蜂殺入季後賽。
泰保杜用殘球員並非新聞，唔少球迷都認為主將戴歷羅斯慘成「玻璃人」都係拜呢位「地獄主帥」所賜，難怪有fans瘋狂改圖，呼籲公牛會方「拯救」占美畢拿，擔心呢位Ironman會步戴歷羅斯後塵。
除公牛外，灰熊尋日以103比82大勝紐約人後，亦成功獲得季後賽資格。至於仍要為季後賽席位努力嘅塘鵝，明早將於主場恭候火箭。
（now 678周四早上8時直播）
ＮＢＡ今日賽程
7:30am：活塞 Vs 速龍
8:00am：公鹿 Vs 熱火
8:00am：雷霆 Vs 湖人(now 678直播)
8:00am：小牛 Vs 馬刺(now 635直播)
10:00am：帝王 Vs 76人
10:30am：拓荒者 Vs 勇士(廣東體育及中央5台直播)
前者主場