校園貴公子甘做流浪漢
昔日街場波牛在時代變遷中漸告消失，本地波「青訓搖籃」標準流浪近年在街場再無法找到新球員，反而踩入校園有新發現。新一代流浪青訓產品又出爐，今期新秀冇晒波牛，取而代之係高學歷貴公子，當中包括已獲大學提前取錄的中學尖子、大學畢業生，仲有個準律師。有咗呢班校園新兵加入，流浪成隊波形象當堂升呢！
「鳳凰計劃」規定港超球會必須成立青年梯隊，但組織青年軍唔係你話搵就搵到，今時今日街場波牛絕迹，各隊組隊都會與區隊或足球學校合作，甚至直接踩入校園在學界賽事物色球員，前年當選香港足球先生的黃洋，就係來港讀書踢大學隊期間被傑志發掘，成為職業球員並入選港隊，而現時多位現役球員例如太陽飛馬陳柏衡同葉頌朗，都係大學生球員。
組青年軍要踩入學界
多年來在街場及地區尋找新血的流浪，近年轉移陣地到學界賽事揀蟀有一定收穫，多位高學歷球員準備在球圈闖蕩，其中前男拔萃隊長、現就讀理大1年級的黃子恩，已獲安排由流浪轉會南區，協助該隊升班準備來季征戰港超聯，其餘幾位新秀，亦會於今季下半季適當時候獲流浪安排上陣。
為踢波有律師都唔做
眾新兵中，前鋒郭彥騰與門將周朗僖均已大學畢業，郭彥騰更是留學英國的法律系畢業生，有律師唔做走嚟踢波，他表示希望一圓自己的足球夢：「其實我去英國留學之前入選過香港青年軍，為學業被迫放棄踢波，依家讀完書，家人亦唔反對我追夢。」
吳擎天是英華書院中六生，今年要考中學文憑試，不過近日已收到城大的取錄信，可以放心踢波；至於港德混血兒韋健豪在喇沙書院畢業後現就讀理大副學士，他表示：「家人都全力支持我踢足球，父親更希望我可以去德國落班。」
韋健豪
19歲 右中場
理大
港德混血兒，期望將來回德落班
廖澔弘
18歲 前鋒
英華
今年考DSE，期望季尾可上陣
吳擎天
18歲 中堅
英華
剛獲城大取錄，但想考好DSE
周朗僖
22歲 門將
浸大畢業
已完成學業，可全職投入訓練
黃子恩
19歲 進攻中場
理大
剛轉投南區，協助球隊升班
關華恩
22歲 右後衞
理大
為考大學暫停練波，考入後復出
郭彥騰
22歲 前鋒
法律系畢業
赴英前入選港青，學成回港圓夢
周倬匡
22歲 左中場
理大
剛入大學，希望學業同足球兼顧
圖／文：黃兆崑