意甲搵索模主吹賽事吸客！恩沙基女友兼意國著名模特兒羅曼莉（Claudia Romani）成功考獲意甲及意乙球證資格，準備轉行全職擔任判官，可望成為意甲史上首位女球證。球員、球迷當然歡迎啦，最大得益者肯定係AC米蘭，羅曼莉隨時幫恩沙基吹死對手，令一向蠱惑多多嘅意甲增添美艷變數。
上季意大利低組別賽事已出現一位25歲模特兒球證艾倫娜，令人驚艷，羅曼莉有望空降意甲，更令人期待，佢話：「同成班球員喺球場周圍跑，再去吹罰佢哋係個不可多得機會。」現年32歲嘅羅曼莉，06年獲丹麥《FHK》選為全球百大性感模特兒，平時經常為《GQ》及《Maxim》等雜誌拍攝，或者球員都好樂意畀佢吹罰。
羅曼莉同足球甚有淵源，男友正係AC米蘭主帥恩沙基，受到呢位意國一代射手薰陶愛上足球，已擁有幾個級別嘅足球教練牌。羅曼莉依家考埋意甲及意乙球證資格，拍住恩沙基玩轉意國球壇都得。