牛下女車神末段秒殺天使
自爆過去4年狂煲過千場爭先賽鑽研戰術的李慧詩（Sarah），4強鍊贏中國林俊紅，躋身決賽硬撼鍾天使，首場落敗的Sarah，於第2場再度壓線「輸掉」，不過大會利用官方指定計時天梭表的儀器，以及翻看錄像後，宣布鍾天使霸佔對手線道犯規，判李慧詩上訴得直追成1比1，需要鬥最後一場分勝負。Sarah於第3場「睇定嚟食」，最後清脆力壓對手衝線，繼日前的競輪賽後再摘金牌。
沈金康罕有畀足100分
李慧詩賽後受訪時表示，因犯規被判輸的鍾天使壓力較大，自己於第3場可以放膽踩，並自爆賽前緊張到「瞓唔著」：「比賽前幾晚緊張到失眠，直情聽到自己心跳聲。好多謝教練、工作人員、屋企人同傳媒嘅支持。爭先賽好難贏，以前對住鍾天使同林俊紅平均鬥5次先贏得1次，所以今日真係好激動，激動到唔記得自己舉起過架單車慶祝。」向來嚴謹的沈金康教練，亦罕有地給予愛徒滿分：「我好少畀人100分，但Sarah今次最後200米表現絕對值100分！」
