天氣不似預期，想不到踏入9月深秋的南韓仍會打風落雨，天氣報告話有個颱風本來吹去香港附近，點知突然急轉彎北上，仲一路打到嚟南韓，莫非亞運會比賽精彩得滯，呢個風都想來趁熱鬧？
颱風搞到呢邊天氣好唔穩定，香港人慣晒打風，都唔係好驚，但亞運會期間打風，又真係冇諗過。其實大型運動會出現奇特天氣，可以數番去8年前卡塔爾多哈亞運，即係當年擊敗香港取得亞運主辦權嘅城市，小弟適逢其會有幸採訪，當時多哈開幕頭幾日都落大雨，搞到場館水浸。
沙漠都落雨！仲有咩係唔得呢？當年多哈呢場雨，當地人個個笑逐顏開，因為據說係創咗唔知幾多十年來最高降雨量紀錄，場館水浸係因為冇諗過落雨，所以起場館時冇整去水系統，亦即係你唔會去沙漠賣雨褸啩？
至於南韓仁川呢邊，惡劣天氣暫時只影響到賽艇中心一帶地區，又濕又凍反而有利港隊發揮，賽艇隊攞咗1金2銀，都話咗港人慣晒打風啦，就算有咩力場，都好平常啫！
馬田＠仁川