渡海濠情:壞車要推 男友認衰

最近美國有個31歲男人,計劃推住一個直徑6呎嘅大波,由加州出發,步行數千公里去到紐約,目的係要大家多啲關注男士睾丸嘅健康,嚟自龍會嘅紅紅就話:「我曾經推過車,明白推嘢真係好辛苦o架!」

幫手推車

紅紅話:「你咪笑成咁樣!我講嘅推車,真係落地推車呀!我以前有個男朋友,佢一考到車牌就出咗架『錢七』,架二手車只賣三千蚊,性能係點大家都估計得到,但我男朋友旨在有架車嚟呢度去嗰度去,而第一個乘客當然係我,嗰日第一次坐男朋友嘅車,我都特別隆重其事,着件洋裝衫裙赴約,點知由佢屋企開嚟都冇事,但到我一上車就撻極都撻唔着,由於我冇車牌,惟有焗住要落車推,你睇我斯斯文文,邊推得郁咁大架車,最後幾經辛苦推得郁啦,我返到上車時已經身水身汗,條裙仲染滿油漬,佢話車我去郊外玩,我都醒!你架『錢七』可以捱到去郊外?你唔好玩啦!我於是叫佢車去附近食肆好啦!食完嘢臨走時架衰車又拋錨,今次有餐廳職員幫手,咁都好啲!」

無力再推

之後唔使推啦!紅紅話:「嗰晚平安送咗我返屋企,但我話過下次再用呢架『錢七』嚟接我,我絕對唔會上車,我男朋友亦明白呢架嘢五勞七傷,所以佢努力儲錢,買咗架新車,於是咪又同佢去遊車河囉!嗰晚一切正常,於是男朋友就話車我去睇星,睇乜嘢星?見佢慾火攻心,九成想車我去僻靜嘅地方嚟個『車震』,由於我都未試過,咪同佢去癲吓囉!大戰一輪後,我都已經手軟腳軟,當佢開車返去時,架新車竟然跪低,車上只有兩個人,我惟有再落車推,當時渾身乏力,但仲要我出力咁推,你話係咪激死人吖!到推着之後,我已經筋疲力盡,最後心諗再係咁都唔係辦法,於是連男朋友都換埋,以後都唔使我推車,所以我明白推住重嘢嘅滋味,只有希望佢,加油呀!」

撰文:小德

攝影:阿生