退役想踢波英超夢未發完
「閃電俠」保特昨日訪滬接受傳媒訪問，大談波經及前程。這位曼聯忠實粉絲表示絕對會力撐愛隊，期望「紅魔」可以扭轉開季4場不勝的頹勢，又重申退役後盼由田徑場轉戰足球場，目標甚至是一圓「英超夢」！
保特直指曼聯上季表現一般，希望新帥尹戈爾今季可以扭轉乾坤：「我梗係想佢哋今季有好表現啦，雖然開季踢得好曳，但我仲好期望佢哋之後可以踢得愈嚟愈好。」
至於將來退役後的打算，這位牙買加飛人就希望可以一圓成為足球員的夢想：「我最想都係做職業球員，希望將來可以在英超踢波。」雖然保特熱愛打碟，但他指現時行程太密，自己疏於「練習」，故不太可能做職業DJ搵食。