羅美路「撲」殺師傅尹戈爾！阿根廷尋日喺世盃4強淘汰荷蘭，將與德國喺周一凌晨上演86、90年翻版決賽。阿根廷成功晉級全靠上季喺摩納哥長坐冷板嘅門神羅美路，喺互射12碼階段連救兩球贏4比2，不過對手「橙衫軍」教頭兼師傅尹戈爾爭住邀功，話羅美路咁勁係因為有佢親身指點，但呢位「冷板門神」真正嘅秘密武器，更有可能係複製8年前列文嘅「貓紙戰術」，全靠一張收埋喺褲襠嘅神秘紙條「提水」！
阿根廷尋日同荷蘭合演一場防守大戰，兩軍王牌美斯同洛賓喺對手嚴密看管下發揮機會唔多，雙方踢埋加時都未能打開紀錄，需以互射12碼決勝負，結果阿國門神羅美路成功撲出華亞爾及史奈達嘅射門，頭4輪全部射入嘅阿根廷終以4比2殺敗荷蘭打入決賽（見附表），阿根廷門將哥高查仲話呢一幕令佢諗起90年世盃4強，自己救出意大利兩球12碼贏波嘅歷史性一幕添！
羅美路嘅「英雄級」演出，連荷蘭主帥尹戈爾都爭住邀功，喺賽後大爆羅美路嘅12碼撲救技術，正正係佢執教阿爾克馬爾嗰陣親身傳授，勢估唔到呢位曾共事兩年嘅昔日弟子，居然反咬「尹師傅」一口！雖然尹高爾講到似層層，但電視鏡頭就影到羅美路喺互射12碼期間，每次把關前都會耷低頭，由褲襠拎出一張紙條當住對手面細閱，同前德國門將列文喺06年世盃8強嘅「12碼大戰」淘汰阿根廷嗰陣，借智囊團提供嘅「貓紙」撲出對手兩球12碼如出一轍！羅美路賽後仲懶神秘，堅稱呢張助教畀佢嘅紙條上面唔係咩重要資料，但就話：「總之幫到我啦！」
羅美路除咗將勝仗獻畀已經過世嘅雙親，仲喺底衫印咗家人名字縮寫，連美國女歌手Rihanna都不斷喺twitter大讚，佢位索模老婆艾蘭娜豪言如果阿根廷奪冠，會忍痛將老公「借」畀Rihanna一個星期當係慰勞呢位門將喎。
由於阿根廷對上兩屆決賽周均被德國踢出局，足智彩開出決賽盤口為德國讓平半，明顯較睇好日耳曼軍團。