未做過球星？唔緊要，不妨做「球星老竇」過吓癮喇。正值4年一度嘅世盃，勁多球迷都將自己小朋友個名改成球星名，據巴西《環球體育》透露，單計5月，巴西米納斯吉拉斯州北部有32位小朋友改名做大衞雷斯，有啲父母索性串埋幾個球星名畀自己小朋友用，認真誇張。
巴保沙夫婦就係大衞雷斯嘅「父母」之一，佢哋喺今屆世盃揭幕戰開波前15分鐘迎接呢位家庭新成員。事後巴太話老公覺得大衞雷斯呢個名夠活力，佢又相信自己嘅雷斯仔，可以為正牌雷斯帶來好運。據報喺16強巴西鬥智利前2日，又有一個大衞雷斯出世，森巴大軍最終憑互射12碼淘汰對手，話唔定呢班「雷斯」係巴西嘅福星都未定。
改名又冇話限死用自己班國腳嘅，住喺巴西北部嘅基羅斯10年前幫個大仔改名做「列基美‧沙維奧拿」，佢啱啱出世嘅細仔就改做「列貝利‧美斯‧利雲度夫斯基」，基羅斯指改呢個名都唔容易：「一開頭政府官唔肯幫我，話驚個小朋友好難學識寫自己個名。我咪駁佢話我個大囝都識寫自己個名啦。」
但唔係愈多球星「上身」就愈好，有位法國粉絲嘅巴西爸爸叫自己個囝做「施丹‧亨利‧巴夫斯‧簡東拿」，呢位7歲男童甚至背唔晒自己個全名，仲呻話唔識呢班人。呢位小施丹同記者講，佢最希望自己叫路爾斯古斯達禾，睇嚟小朋友寧願畀自己嘅國家英雄上身好過。