亨特拉爾入替建奇功
荷蘭前鋒亨特拉爾今仗落場14分鐘就以1傳1射救荷蘭一命，佢射入奠勝士哥後嘅一記功夫腳慶祝熱爆網，賽後更自爆係洛賓讓射12碼令佢做英雄！
亨特拉爾今場76分鐘入替隊長尹佩斯，佢先喺88分鐘嘅角球攻勢中頭槌二傳畀史奈達勁抽入網，去到補時階段洛賓博得12碼後主動讓畀亨特拉爾射，而佢亦一射中鵠，興奮到癲嘅亨特拉爾隨即衝向場邊以功夫腳飛踢角球旗，呢一下型爆飛腳即刻hit爆網，畀網民喪改圖，當中最正一張就係佢飛踢墨西哥門神奧祖亞。亨特拉爾下場8強對哥斯達黎加將再同洛賓聯手，化身「復仇者聯盟」，13年前嘅世青賽，有亨特拉爾同洛賓在陣嘅荷蘭以1比3不敵哥軍出局，下仗正係復仇好機會﹗