J神向C朗挑機

哥倫比亞昨凌晨喺世盃16強憑「新男神」占士洛迪古斯獨建兩功,包括一球窩利世界波,以2比0擊敗烏拉圭,歷史性躋身8強,占士仔4場入5粒進佔射手榜一哥,一夜封「J神」勁爆上位,呢位靚仔兼好波嘅新星更自爆希望加盟皇馬,唔通想挑戰「萬人迷」C朗嘅地位?

哥倫比亞挾住分組賽全勝氣勢,面對有蘇亞雷斯停賽嘅烏拉圭表現輕鬆,新核心占士洛迪古斯最Sharp醒,28分鐘佢離門30碼背對龍門先用心口一控,然後轉身左腳窩利抽射「世界波」中楣彈入,烏軍門將梅斯利拿飛盡掂到都冇符,下半場佢再接應古達度頭槌二傳,伏兵門前射成2比0,入波後哥倫比亞球員並冇好似之前咁跳舞慶祝,而係圍成一圈雙手指天,似係紀念20年前美國世盃,因擺烏龍返國後遭槍殺嘅哥軍名宿艾斯高巴3日後之忌辰,場面感人,最終哥倫比亞以2比0輕取烏拉圭,創造歷史首次殺入世盃8強。

4戰入5粒登射手榜一哥

占士洛迪古斯4戰入5粒升上射手榜一哥,仲要場場有士哥,旋即成為風頭躉,烏拉圭領隊泰巴尼斯話佢達到馬納當拿、美斯嘅級數,NBA巨星勒邦占士亦讚佢:「睇完哥倫比亞場波,令我搵到今屆世盃我最愛球員,占士呢個名令佢更勁。」連碧基女友、哥倫比亞樂壇天后夏奇拉都High爆喺twitter留言:「殺入8強喇!占士感謝你,我要給你抱抱。」賽後「J神」受訪時自爆想加盟皇馬:「若可轉戰西甲真係夢想成真,相比巴塞,我更鍾意皇馬。」「J神」靚仔又好波,如果上「艦」勢必成矚目球星,分分鐘搶埋C朗嘅萬人迷地位。

19歲早婚有位千金

陽光少年占士洛迪古斯由「占士仔」榮升「J神」,風靡萬千少女,不過呢位怕醜仔早已名草有主,佢19歲嗰陣就同現時哥倫比亞正選門將奧斯賓拿嘅妹妹丹妮娜拉埋天窗,依家仲做埋老竇,囡囡莎樂美已經1歲大喇。上季高價轉投法甲摩納哥嘅「J神」,同老婆恩愛到暈,真係靚仔又專一。

James Rodriguez

年齡:22

身高:180cm

位置:進攻中場、翼鋒

現効力球會:摩納哥

曾効力球會:恩維加多、班菲特、波圖

國家隊出場次數/入球:26/10