運動員玩瑜伽已經唔係新鮮事，外國早幾年已經開始流行，游水、足球、高爾夫球、排球等運動員都有練瑜伽去提升平衡力同改善呼吸節奏，對於專業運動員來講，絕對係一件好好嘅額外訓練。
小弟上個禮拜第一次去玩瑜伽，係！第一次！完全感受到瑜珈嘅威力。本來以為自己嘅柔軟度都幾高，不過天外有天，人外有人，練瑜伽嘅人柔軟度簡直係不可思議！我上個星期開始上三、四堂瑜伽課，由最基本學起，唔係講笑，我真係每一次都滿頭大汗，成件衫都濕晒，同跑步嘅效果有過之而無不及。
練瑜伽除咗可以改善呼吸節奏之外，亦都可以提升腰腹部力量，從而鍛煉到深層肌肉，一如你舉重做力量訓練唔會練到肌肉，但瑜伽就可以。最重要一點係瑜伽可以提升一個人嘅柔軟度，同埋關節靈活性，對於一個高要求運動項目絕對有好大幫助。
當世界級運動員已經開始練瑜伽作為訓練一部分嘅時候，有心唔怕遲，其實依家先開始都唔係好遲！有興趣又未開始嘅朋友們，我覺得你哋係時候開始喇，鍛煉好身體，一齊向健康生活進發，不如我哋約埋一齊練瑜伽啦！
鍾國樑（Alex）
天生運動狂，前亞運游泳香港隊「水霸王」