米高佐敦籃球鞋系列之中，最經典肯定係11代，呢對生產於96年嘅「神之鞋」以當年最前衞兼大膽嘅漆皮配搭，引來全球球迷幾日瞓街排隊搶購，更瘋狂係美國「童黨」為咗呢對神級球鞋開槍殺人。
另一對最受球迷歡迎嘅Air Jordan必屬第1代，當年（1984年）米高佐敦只係NBA一名新丁，但NIKE孤注一擲以5年250萬美元合同波神簽約，雖然紅黑白三色配搭當年係NBA「禁色」，破格顏色亦被球迷嘲諷為小丑鞋，但NIKE堅持佐敦着住AJ1上場，寧願每仗為波神邀交5,000美元罰款，結果呢一招成為最佳廣告宣傳，加上呢對鞋係挑戰道德規矩，令球迷更Buy！
黃興桂講過睇米高佐敦有今生冇來世，但佐敦系列波鞋咁受歡迎，NIKE方面當然要將佢不斷「重生」賺番筆，大熱鞋款1代、4代、5代及11代等復刻再復刻，但依然有價有市，最高炒價逾7,000港元，作為香港AJ迷更慘，永遠「只聞開售日，不見有其貨」，貨架上絕不可能見到AJ熱賣波鞋出現，想買鞋惟有提早半個月登記抽籤！