隨着時代進步，科技普及化，有愈來愈多運動員將科技運用喺訓練上。不過，科技真能幫上訓練嗎？不如我用游泳訓練作為例子啦。
一隻專為游泳訓練嘅錶，能計算泳速、分段時間、頻率、心跳等，絕對可以幫助訓練。游泳係個人運動，非常獨立，最重要係泳手本身嘅自律性同態度，教練只不過係輔助性，畀目標你，畀壓力你，畀鼓勵你，令你衝破自己，力爭上游。
不過，有一款游泳訓練用對講機，泳手戴耳機，教練用對講機同泳手講技術、時間等，我對此就有保留！因為游泳係一項非常獨立嘅運動，泳手要高度集中，要準確知道每一下動作，要不斷嘅練習去感覺速度、頻率及效率。一部對講機就可能打擾泳手寧靜嘅內心世界，當你游到進入一個忘我境界，突然有一把聲去提醒你，叫你將手提高，伸直，嗰一刻我諗你都會好無奈。當你哋比賽時再冇人提醒你幾時要加速、幾時要放慢，你就唔識自己去掌握一個節奏去游，咁樣同你係一個機械人又有乜分別呢？所以話科技令人進步，亦都令人退步。我都係鍾意原始模式，靠自己、靠感覺。
天生運動狂，前亞運游泳香港隊「水霸王」