巴利仔開P辣慶肥安
「大聖爺」喪蒲搞到被雪？日前皇馬拉大隊去多哈與聖日耳門進行西甲重開前最後拍跳，但唔多齊腳，其中天價飛翼加里夫巴利竟然冇份，官方報稱因其小腿傷勢未痊愈而未有隨隊。不過《世界體育報》就爆料，話「大聖爺」可能喺跨年P玩得太過High搞到缺態，主帥安察洛堤索性將佢留番喺馬德里。
正所謂有圖有真相，加里夫巴利唔好話人哋屈你呀，相中着晒老西嘅「大聖爺」，喺包括女朋友愛瑪在內嘅幾位靚女陪住開跨年P倒數，其中有兩個金髮索女仲烏低身，狂騷事業線勁吸睛，睇到「大聖爺」流晒口水High到爆，同咁多靚女喪蒲成晚仲邊有狀態呢！以前「大聖爺」喺英超，無論拆禮物日定元旦等都要打生打死，難得依家嚟到西甲有得歇冬抖抖，仲唔趁機作反勁玩咩。據報皇馬主帥安察洛堤對住呢位百厭星敢怒不敢言，惟有話佢未好番唔使出征多哈，雪佢一場咁大把囉。
準老竇卡斯拿斯手騰腳震
除咗「大聖爺」之外，今次仲有法比奧干查奧、華拉尼、基迪拉因傷冇隨隊，隊長卡斯拿斯因為記者女友莎拉嘅預產期係下星期一，所以「銀河艦隊」都識做，批准佢免役留喺西班牙陪莎拉。「聖卡斯」守龍就叻，但講到湊B就零經驗，最近佢同莎拉喺西班牙放聖誕假嗰陣，就向傳媒自爆話好緊張，驚BB出世之後會手忙腳亂，所以近排已經學定換尿片，亦都預咗短期內冇覺好瞓，準備每晚同BB「鍊過」。
美斯練「倒西」射球
至於皇馬死敵，巴塞嘅王牌美斯，養傷兩個月後已經好番晒，近日佢練波練到冇嘢好玩，索性喺龍門後面將個波「的」幾「的」，跟住一腳抽上天，個波先喺離門前唔夠六碼落地，之後就有「倒西」彈入網，負角度都入到波咁犀利，睇嚟佢嘅狀態返晒嚟喇！