碧咸王國染指澳門
碧咸繼續擴充其亞洲商業版圖，今次係同金沙中國合作！尋日「萬人迷」現身澳門威尼斯人酒店，宣布將同金沙中國成為合作伙伴，於澳門嘅綜合度假村同新加坡嘅濱海灣金沙發展一系列商業同慈善合作。佢第一個參與嘅節目，將會入場觀看嚟緊周日「金光決戰」拳賽，據聞國際名媛Paris Hillton亦會係座上客，碧咸咁有計，遲啲唔知會唔會入埋股，升呢做賭神呢？
「萬人迷」尋日同金沙中國有限公司總裁兼行政總裁愛德華‧卓思及濱海灣金沙總裁及首席執行官喬志‧騰一齊出席發佈會，大會用「全球最具代表性男士之一」嚟形容碧咸，發布會上宣布雙方將會有新合作，碧咸當然大賣口乖：「呢個度假村規模、理念同水準都令人有深刻印象，同佢哋嘅團隊一齊發展一系列新穎商業構思同慈善活動，令我感到期待同興奮。」
證實邁阿密搞波大計
咸爺亞洲影響力又再進一步，佢喺美洲實力當然亦不容忽視，尋日佢亦親口證實，自己喺邁阿密籌組新美職球會一事，雖然冇透露實際內容，但見佢信心十足，進度應該幾好。不過，英國《太陽報》就報道，碧咸可能遇上少少阻滯，如果佢未能於6星期內搵到一個合適主場館，籌組經費將由2500萬美元，跳升至1億美元。
碧咸喺發布會上亦同大家分享咗一啲職業生涯嘅事，話自己最難忘係當上英格蘭隊長，另外是01年對希臘時，為英格蘭射入自由球追平對手，帶領英軍打入韓日世界盃，當然為曼聯贏得三冠王亦畢生難忘。
睇金光決戰捧帕克奧
至於最遺憾係98世界盃對阿根廷時領紅牌，間接令英格蘭十六強止步。碧咸憶述當時費格遜同佢講：「阿仔，返嚟曼聯就無事架喇。」佢好多謝費Sir對自己不離不棄，成就佢依家有今日。
碧咸又話心目中英雄係前美國重量級拳王阿里，話佢做人及奮鬥嘅理念好值得人學習，自己亦因為阿里鍾意睇拳，亦曾經同菲律賓拳王帕克奧有一面之緣，所以會留低睇拳支持帕克奧。