林書豪最佳第6人熱爆
林書豪（Jeremy Lin）今季改任後備，果然殺出一條新血路！「林瘋」昨日貫徹近期強勢，在為舊東家打氣而來的大師兄姚明（Yao Ming）面前，全場貢獻了16分、4個籃板及7次助攻，協助火箭在主場以122比111打碎金塊，佢今場嘅全面演出，讓客軍丹佛的傳媒都睇好「林瘋」有力競逐「最佳第6人」殊榮！
今季火箭改由比華利（Patrick Beverley）擔任正選控衞，不過勢估唔到被貶後備之後J.Lin反而更爭氣，昨仗後備登場交出16分、4個籃板及7次助攻，計埋呢一仗，「林瘋」近4場波喪入102分，而呢場帶領火箭大勝金塊11分嘅佳作，讓專程返豐田中心為火箭打氣的姚明拍爛手掌。
J.Lin賽後話：「我覺得今場全隊嘅防守都好落力，隊友間亦表現得相當無私，令我哋爭取到好多起手機會。」事實上火箭此役整體發揮的確好全面，全隊有七名球員得分達雙位數，亦有七人抓下3個或以上籃板球，甚至曾經成功封阻對方起手嘅都有七個人，自開賽初段打出一段10比2攻勢後，便一直領先至完場。
公牛撞破溜馬金身
另外，林書豪又自爆其母親經常與「姚媽媽」通電，透露兩家人關係密切，並好感激姚明一直以來對他的幫助。丹佛傳媒表示，「林瘋」以後備身份出戰壓力反而較細，若能在今季餘下時間保持這種高水準演出．絕對是「最佳第6人」熱門人選。
另外，公牛昨日靠傷愈的戴歷羅斯（Derrick Rose）攻入20分，主場以110比94擊敗溜馬，打破後者新球季不敗身，公牛明早續於主場鬥山貓，力爭5連捷。
本報綜合報道